Өңірге іссапармен келген Ғылым және жоғары білім министрі Саясат Нұрбек І.Жансүгіров атындағы Жетісу университетінде жас ғалымдармен жүздесіп, оқу орнының жай-күйімен танысты. Сондай-ақ оқушылар мен менторларға арнайы дәріс оқып, білім сапасын арттырудың маңызын түсіндірді.
Білім алуға жасалған қолайлы инфрақұрылымды бағалай отырып, студенттердің оқу ғимараттары мен үйлерін қарап шықты. Сала басшысы Биотехнология және экология ғылыми-зерттеу институтында болып, мекеменің ғылыми қызметкерлерімен кездесті. Диалог барысында өзекті жобалар мен олардың даму әлеуеті, атап айтқанда, ауыл шаруашылығы саласындағы әзірлемелерге шоғырланған молекулалық генетика және геномика зертханасының жұмысы талқыланды. Ондағы зерттеудің маңызды бағыты – дақылдардың икемділігі мен әртүрлі стресс факторға төзімділігін арттыру.
Одан кейін министр университетке жиналған облыс жұртшылығы өкілдерімен дидарласты. Жиынға тұрғындардан бөлек мемлекеттік және жергілікті атқарушы органдардың өкілдері, профессор-оқытушылар құрамы мен жоғары оқу орындарының студенттері қатысты. Жиында еліміз бен өңіріміздің ғылым және жоғары білім жүйесін дамытудың негізгі мәселелері талқыланды. Министр өз сөзінде еліміздегі ғылым, жоғары білім және жоғары оқу орнынан кейінгі білім саласындағы негізгі жетістіктер мен нәтижелерге шолу жасады. Ол ел болашағы үшін білім мен ғылымды дамытудың маңыздылығын атап өтіп, министрліктің стратегиялық мақсаттары мен басымдықтары туралы айтты. Білім беру сапасын жақсартуға және ғылыми зерттеулерді қолдауға бағытталған жоспарлар мен міндеттерге ерекше назар аударылды.
Сондай-ақ Саясат Нұрбек қазіргі ғылым мен жоғары білім беру жүйесі алдында тұрған негізгі үрдістер мен сын-тегеуріндерге талдау жасады. Ол жаңа технологиялық және әлеуметтік өзгерістерге бейімделу қажетін атап өтіп, іс-шараға қатысушыларға белсенді қатысқаны және пікір алмасқаны үшін алғысын білдірді.
Кездесу барысында сала басшысы тұрғындардың сұрақтарына жауап берді. Гуманитарлық ғылымдар жоғары мектебінің оқытушы-лекторы 2030 жылдан кейін елімізде жоғары білім алуға арналған гранттардың сақталуына қатысты сұрақ қойды. Бұл мәселе «Келешек» болашақ студенттерді оқыту үшін бірыңғай бірлескен жинақтау жүйесін құрумен байланысты туындап отыр. Министр «мемлекеттік гранттарды бөлу сақталады, ал жоспарланған «Келешек» бағдарламасы гранттың бөлінуіне ешқандай әсер етпейді», деп жауап берді. Баланың шотындағы ақша оның грантқа түсу-түспеуіне қарамастан сақталады деп нақтылады.
Іс-шара соңында Саясат Нұрбек облыс азаматтарын жеке қабылдап, оларға жоғары білім мен ғылым бойынша өз мәселелері мен пікірлерін білдіруге мүмкіндік берді. Азаматтар өңірдегі білім беру мен ғылыми саланы дамытуға байланысты түрлі тақырыпты талқылауға белсенді қатысты. Министр кездесуге қатысушыларды тыңдап, маңызды мәселелерді белсенді талқылағаны үшін ризашылығын білдіріп, халықпен ашық диалогтің маңыздылығын атап өтті және Жетісу облысындағы білім мен ғылымды дамыту стратегиясын әзірлеу кезінде алынған барлық пікірді ескеруге уәде берді.
Түстен кейін С.Нұрбек Талдықорған қаласының мектеп оқушыларымен және менторлармен кездесіп, Мемлекет басшысының биылғы Жолдауында айтылған жас ұрпақтың қауіпсіздігі, психикалық саулығы, зорлық-зомбылыққа қарсы іс-шаралар және білім сапасы тақырыбында дәрісін өткізді. Еске сала кетейік, Талдықорған қаласында облыс әкімі Б.Исабаевтың тапсырмасы бойынша қанатқақты режімде 1 қыркүйектен бастап Жетісу облысының қоғамдық даму басқармасы жанынан «Әдеп-тәрбие жөніндегі ментор» жобалық кеңсесі құрылған еді. Ондағы мақсат – оқушылардың тұлғалық дамуын менторлық сүйемелдеу және құқыққа қайшы мінез-құлықтың барлық түрінің алдын алу арқылы бірыңғай тәрбие кеңістігін қалыптастыру. Жобаның мазмұнымен танысқан министр оның маңыздылығын атап өтіп, оқушылардың сауатты өмір сүруіне, өз жолын оңай табуына жәрдемдесетініне сенім білдірді.
Жетісу облысы