Бельгияның Антверпен қаласында өтіп жатқан спорттық гимнастикадан 52-әлем чемпионатында Милад Карими тарихи жүлдеге қол жеткізді.
Жарыстың кезекті күнінде ұлттық құрама көшбасшысы еркін жаттығудың финалында 14.600 ұпай жинап, үздік үштіктің қатарынан көрінді. Бұл сайыстың бас жүлдесі Артем Долгопятқа (Израиль) бұйырса, күміс Казуки Минамидың (Жапония) еншісінде кетті. Миладтың бұл жүлдесі қазақ гимнастарының 1997 жылдан кейін әлем чемпионатында қол жеткізген алғашқы медалі болды. Ол кезде Сергей Федорченко Лозаннадағы додада бағанадан секіруден чемпион атанған.
Былтыр Ұлыбританияның Ливерпуль қаласында өткен әлем чемпионатында Милад еркін жаттығудың финалында 12.100 балл жинап, 8-сатыдан көрінген еді.