Театр өнерін түрлендірген талантты тұлға Бикен Римованың 100 жылдығына арналған «Biken» I Халықаралық фестивалі аяқталды. Бір аптаға созылған өнер бәйгесінде үздік шыққандар марапатталды. Ең ғажабы, бұдан бұлай аталған театр додасы дәстүрлі түрде өтетін болады.
Айтулы іс-шараның беташар сөзін алған облыс әкімінің орынбасары Рустам Әли әуелі өңір басшысының ыстық сәлемін жеткізіп, руханият үшін, түбі бір түркі халықтарының өнерін өрістету үшін осындай фестиваль керек екенін атап өтті. Өнері өркендеген елдің өркениеті түзу, келешегі кемел болатынын атады. «Biken» I Халықаралық театр фестиваліне қатысқан барша өнер ұжымына облыс әкімінің Алғыс хатын табыстады. Сондай-ақ Биапа театрында еселі еңбек етіп, өнердің дамуына үлес қосып жүрген Аман Қожабеков, Әйгерім Бектемірова, Нұргүл Кемербаева, Дулат Жарбасов, Ұлдар Оңғарбекқызы, Ұлжалғас Жұмәділова, Салтанат Асханбаева сынды театр қызметкерлеріне Мәдениет және ақпарат министрлігінің Алғыс хатын табыстады.
ТҮРКСОЙ Халықаралық ұйымының бас хатшысы Сұлтан Раев Б.Римова атындағы драма театрында еңбек етіп, өнері мен өмірін көпке арнаған Дина Нұрғалиеваға «Құрмет» орденін табыстаса, Алмахан Кенжебекова, Ерлік Жуасбек, Ұлан Ахметов, Дастан Пышанов, Роза Қапашеваны ТҮРКСОЙ ұйымының 30 жылдығына арналған мерекелік медальмен марапаттады. Өз кезегінде фестивальға қатысқан 5 мемлекет және еліміздің түкпір-түкпірінен келген театрлар ТҮРКСОЙ Халықаралық ұйымының Алғыс хатымен мерейленді.
Сахна саңлағының ғасыр тойына орай алғаш рет өткен Халықаралық фестиваль қорытындысы бойынша «Аmanat» партиясы тағайындаған арнайы жүлдені (300 мың теңге) Ж.Аймауытов атындағы Павлодар облыстық қазақ музыка-драма театры еншіледі. Ал ғажайып тұлға Шолпан Жандарбековадан дәріс алған шәкірттері Ш.Жандарбекова атындағы арнайы жүлде тағайындап, оған Оралхан Бөкейдің «Атау-Кере» қойылымында келін рөлін сомдаған С.Сейфуллин атындағы Қарағанды облыстық академиялық драма театрының әртісі Анель Сағындықованы лайықты деп тапты. Биапа театрының іргетасын қалаған жетісулық өнер ошағының ардагер буыны тағайындаған Б.Римова атындағы арнайы жүлдені Ғ.Мүсірепов атындағы Қазақ мемлекеттік балалар мен жасөспірімдер театрының актрисасы Ақбота Рахат иеленді.
Сол секілді, «Үміт» аталымы бойынша алматылық «Жаңа Ғасыр» театрының әртісі Мақпал Қасенова, «Үздік режиссерлік шешім» аталымы бойынша С.Сейфуллин атындағы Қарағанды облыстық академиялық театрының режиссері Айбын Салбан, «Үздік 2 пландағы ер адам бейнесі» аталымы бойынша Б.Римова атындағы Талдықорған драма театрының актері Сағындық Жұмәділ, «Үздік екінші пландағы әйел адам бейнесі» Әзербайжан мемлекеттік ЮХ театрының әртісі Мегдизаде Гюнеш марапатталды. Ал «Үздік ер адам бейнесі» аталымы бойынша Н.Жантөрин атындағы Маңғыстау облыстық музыкалық драма театрының актері Жанғазы Рысқұл, «Үздік әйел адам бейнесі» аталымы бойынша музыкалық жас көрермен театрының әртісі Шынар Қалдыбай мерейленді.
Күллі елді шаттыққа бөлеген шырайы бөлек додада арнайы тағайындалған Бикен Римова атындағы жүлдені Ж.Аймауытов атындағы Павлодар қазақ музыкалық-драма театры «Ұждан» қойылымы үшін (700 мың теңге) еншіледі. Ал ТҮРКСОЙ ұйымының арнайы жүлдесін талдықорғандық Б.Римова атындағы драма театры (1 мың доллар) ұтып алды. Осылайша, көптің көңілін шалқытқан, көрерменге рухани азық сыйлаған ғажайып фестивальдің алғашқы жеңімпазы әрі «Ең үздік қойылым» аталымының иегері – Ғ.Мүсірепов атындағы Қазақ мемлекеттік балалар мен жасөспірімдер театры деп танылып, облыс әкімінің орынбасары Рустам Әлидің қолынан 1 миллион теңгелік сертификат алды. Айта кетерлігі, фестиваль жеңімпаздары дода барысында Федерико Гарсиа Лорканың «Бернарда Альбаның үйі» қойылымын сахналаған еді.
Жетісу облысы