Шахмат әлемінде жеңілістің кермек дәмін аз татқан спортшылар некен-саяқ. Солардың қатарында 16 дүркін әлем чемпионы, биылғы Әлем кубогінің иегері даңқты норвегиялық шахматшы Магнус Карлсен бар. Алдына келген қарсыласын бет қаратпай жеңетін Карлсен бірер күн бұрын Қатарда өтіп жатқан халықаралық турнирде тағы бір мәрте жеңілді. Әлемдік шахмат жұлдызын бұл жолы қазақ баласы Әлішер Сүлейменов қапы қалдырды.
Бұл күндері Қатар астанасы Дохада шахматтан «Qatar Masters Open» турнирі өтіп жатыр. Әлемнің ең мықты шахматшылары жиналған халықаралық жарыстың екінші кезеңінде отандасымыз Әлішер Сүлейменов аты аңызға айналған шахмат шебері Магнус Карлсенмен ой жарыстырып, қарсыласын қапы қалдырды. Бұл Магнус Карлсеннің карьерасындағы 15-ші жеңіліс болып тіркелді. Карлсен өзінің шахмат жолында еліміздің спортшыларымен үш рет ойнап, тек Ринат Жұмабаевпен ғана блиц шахматта тең түскен екен. Ал Павел Коцур, Мұртас Қажғалиев және Әнуар Исмағамбетовтермен болған ойында Карлсен жеңіске жеткен.
Спортты дамыту дирекциясының мәліметі бойынша, ұлттық құрама ойыншысы норвегиялық шахматшыға қарсы ақ түсті фигуралармен өнер көрсетті. Матчты сәтсіз бастаған әлем рейтингінің көшбасшысы 31 жүрістен кейін жеңілгенін мойындады. 23 жастағы Әлішер – Павлодар шахмат мектебінің түлегі. Қатардағы жарыста Әлішерден бөлек, отандастарымыздан Ринат Жұмабаев, Қазыбек Нөгербек, Бибісара Асаубаева, Алуа Нұрманова бақ сынап жатыр.
Ринат 2-турда үндістандық Шьямнихилды жеңсе, Қазыбек өзбекстандық Жавохир Синдаровқа жол берді. Бибісара Асаубаева өзбекстандық Хумоюн Бегмуратовтан басым болса, Алуа Нұрманова үндістандық Паннерсельвам Иниянмен тең түсті. Қазір Әлішер мен Ринат қана жеңіліссіз келе жатыр.