Бұл күндері ел теннисшілері әлемнің әр қиырында өтіп жатқан теннис турнирлерінде бақ сынап жатыр.
Атап айтар болсақ, ерлер арасындағы еліміздің бірінші, әлемнің 36-ракеткасы Александр Бублик Бельгияның Антверпен қаласында жалауы желбіреген «ATP 250» санатындағы жарысты сәтті бастап, турнирдің ширек финалына жолдама алды. Ресейлік Александр Шевченкомен жұп құрап ойнап жатқан Бублик 1/8 финалда бельгиялықтар – Микаэль Гиртц пен Готье Онклинді екі сетте 7:6 (7:4), 6:4 есебімен жеңді. Александр Бублик жекелей жарыстағы алғашқы кездесуін бүгін франциялық Грегуар Баррермен өткізеді.
Сондай-ақ Қытайдың Шэньчжэнь қаласындағы «Челленджер» турнирінде өнер көрсетіп жатқан Бейбіт Жұқаев та жарыстың екінші айналымына шықты. 1/8 финалда әлемдік рейтингте 249-орынға жайғасқан отандасымыз дүниежүзілік рейтингте 726-орында тұрған қытайлық Сяофэй Ванмен шеберлік байқасып, екі сетте 6:3, 6:4 есебімен жеңіске жетті. Б.Жұқаев бәсекенің ширек финалына шығу үшін бүгін әлемнің 112, осы жарыстың 2-ракеткасы америкалық Александр Ковачевичпен кездеседі.