2028 жылғы АҚШ-тың Лос-Анджелес қаласында алауы тұтанатын Олимпия ойындарында жаңадан бес спорт түрі қосылды. Бұл туралы Халықаралық Олимпиада комитеті (ХОК) мәлімдеді.
Бес жылдан кейін мұхиттың арғы бетінде өтетін Олимпиадада жанкүйерлер крикет, байрақ футбол, сквош, лакросс және бейсбол/софтбол секілді спорт түрлерінің қызықты бәсекелерін тамашалайтын болды. Бейсбол/софтбол, крикет және лакросс спорты Олимпия ойындарының бағдарламасына қайта қосылып отыр.
Мәселен, бейсбол/софтболдың тұсауы Токио Олимпиадасында кесілсе, крикет ең соңғы рет 1900 жылғы Париждегі додада ойналған еді. Ал лакросс спортының бәсекелері 1904 жылы Сент-Луис және 1908 жылғы Лондон Олимпиадаларының бағдарламасынан орын алған. Ал байрақ футбол мен сквош тұңғыш рет Лос-Анджелестегі төрт жылдықтың бәсекесінде ойналмақ.