Құтқарушылар күні қарсаңында Астана қаласының маңындағы Үркер шағын ауданында қызмет бабында ерлікпен қаза тапқан өрт сөндіруші Асқар Серікұлы Забикулиннің аты берілген көшенің ресми ашылу салтанаты өтті.
Іс-шараға Төтенше жағдайлар министрілігінің өкілдері, Асқар Забикулиннің туыстары, жұбайы мен балалары, дос-жарандары және азаматтық қорғау органдарының ардагерлері, Астана қаласы ТЖД басшылығы мен жеке құрамы қатысты. Жиын барысында достары, туыстары, әріптестері Асқардың қызмет барысындағы азаматтығы мен жанкештілігіне ерекше тоқталып, көпке беймәлім қырларын, ерліктерін айтып, туыстары бүгінгінің хас батырына айналған бауырын мақтанышпен еске алды. Сонымен қатар көшенің салтанатты ашылуы барысында Асқар Забикулиннің жақындары, ТЖД қызметкерлері мен ардагерлері көше бойына ағаш отырғызды.
Мемлекет басшысының тапсырмасы бойынша Астана қаласы мәслихатының 2023 жылы 19 қаңтардағы шешімімен Астана қаласындағы көшелердің біріне ержүрек өрт сөндірушінің есімін мәңгі есте сақтау мақсатында Асқар Забикулиннің есімі беріліп, естелік тақтайша орнатылған еді.
Көпшіліктің есінде болса керек, Астана қаласы Төтенше жағдайлар департаменті өрт сөндіру және авариялық-құтқару жұмыстары қызметі жедел кезекшісінің көмекшісі Асқар Забикулин былтыр елордадағы өрт сөндіру кезінде үш адамның өмірін құтқарып, алған ауыр жарақаттан 20 қараша күні ауруханада көз жұмған еді. Оның артында жұбайы мен екі баласы қалды.
Қызметтік борышқа адалдық, мамандыққа деген сүйіспеншілік, мінездің беріктігі мен жауаптылығы – бұл Асқар Забикулинның бойындағы қасиеттер еді. Оның ерлігі мен бейнесі халық жадында мәңгі қалады.