Орнықты даму және азаматтық қоғам

Іс-шараға қатысушылар қатарында ҮЕҰ көшбасшылары, қоғамдық кеңестер­дің төрағалары, Парламент депутаттары, мемлекеттік органдардың, бизнес-қоғамдастықтардың, өңірлік және ұлттық даму институттарының, «Атамекен» ҚР ҰКП өкілдері, азамат­тық белсенділер бар.

Форум жұмысын Мәдениет және ақпарат министрінің орынбасары Данияр Қадыров ашып берді. Вице-министр өз сөзінде азаматтық қоғам Қазақстанның саяси-әлеуметтік жетіс­тіктеріне зор үлес қосып отырғанын атап өтті.

«Еліміздің түкпір-түкпірінен кел­­ген делегаттармен бүгін Астана төрін­де қауышып отырғанымызға қуа­ныш­ты­мыз. Бүгінгі форумның тарихы тереңде жатыр. 2003 жылдан бері аза­мат­тық саланың белсенділігі өте мық­ты дамып келеді. Бүгінгі жиын­ды өткізу мерзімі де маңызға ие. Алдымызда Республика күні келе жатыр. Баршаңызды осынау айтулы мейраммен шын жүректен құттықтаймын.

Мемлекет басшысы Қасым-Жомарт Тоқаев азаматтық қоғамды дамы­туға ерекше мән береді. Еліміз қол жеткізген жетістіктерге азамат­тық сала өкілдерінің қосқан үлесі мол. Ха­лық пен билік арасындағы алтын көпір­ді күш-жігерлеріңізбен, азамат­тық ұста­ным­дарыңызбен жалғасты­рып отырсыздар. «Халық үніне құ­лақ асатын мемлекет» тұжырымда­ма­сын іске асырудағы басты қозғау­шы күш те сіз деп айта аламыз», деді Д.Қадыров.

Вице-министр сондай-ақ Президент заң үстемдігіне ерекше мән беріп отыр­ғанына тоқталды. Осы орайда спикер азаматтық қоғамды көптеген өзгерістің қозғаушы күші деп атап өтті.

«Әрбір заң жобасы алдымен қоғамдық талқылаудан өтеді. Көпшілігіңіз – сол заң жобаларын қарайтын жұмыс топтарына мүшесіздер. Өзгерістер мен ұсыныс жасайсыздар. Осындай еңбектің арқасында қабылданған заңдар бүкіл республика бойынша күшіне енеді. Сон­дық­тан бұл тұрғыда еңбектеріңіз үл­кен. Бүгінгі форум бұған дейін өңірлер­де ұйымдастырылды. Көпшілігіңіз­бен сонда кездесіп, пікір алмастық. Сол іс-шаралардың жаңғырығы бүгін Астана­ға жетіп отыр. Республика бо­йынша өткен форумдардың қорытындысы нә­ти­жесінде ұсыныстар енгізіледі. Айтыл­ған пікірлердің бәрі ескеріледі», деді Д.Қадыров.

Бұдан кейін Қазақстан Азаматтық альянсы басшысы Бану Нұрғазиева сөз алды. Спикер алғашқы форум жұмысы осыдан 20 жыл бұрын өткеніне назар аударды. Оның айтуынша, осы уақыт аралығында әлеуетті азаматтық қоғам қалыптасқан.

«Қазіргі таңда біз өзгердік. Басқаша, мықты әрі кемел азаматтық қоғамға айналдық. Бүгін осы залда белсенді өмір салтын ұстанатын, қамқор жандар отыр. Еліміздің дамуына, әр үйдің береке-бірлігіне үлес қосып жүрген сіздерге шын жүректен алғыс айтамын. Еліміздің 20 өңірінде өткен аймақтық форум – Қазақстанның ХІ Азаматтық форумының басты ерекшелігі. Маған солардың бәрін көру бақыты бұйырды. Әрқайсысы лайықты деңгейде өтті», деді Б.Нұрғазиева.

Спикер өз сөзінде өңірлік іс-шара­ларға облыс әкімдері түгелге жуық қа­тыс­қанын атап өтті. Оның пайым­дауын­ша, бұл – мемлекет пен қоғамның бір­лі­гінің көрсеткіші. Сондай-ақ Б.Нұр­ғазиева азаматтық форумның екі жыл сайын өтетінін жеткізді. «Жиын қоры­тындысы бойынша форумға қатысу­шылардың ұсыныстарын ескере отырып, елімізде азаматтық қоғамды дамыту тұжырымдамасын жүзеге асырудың Жалпыұлттық жоспары қабылданады», деді Б.Нұрғазиева.

Азаматтық форум аясында халық­аралық тренерлердің қатысуымен шебер­лік сабақтары, әлеуметтік жобалардың көрме-тұсаукесері, диалог алаңдары, қайы­рымдылық саласындағы Құр­мет атағын, сондай-ақ респуб­ликалық қоғамдық сыйлықты табыстау өтеді.

Іс-шараның мақсаты – Қазақ­станның стратегиялық мақсаты-әділ мемлекет құру үшін қоғам­ды біріктіруде мемлекеттің толық­қанды және өзара тиімді серіктесі ретіндегі азаматтық сектордың рөлін айқындау.

Айта кетерлігі, қоғам қай­рат­кер­лері­нің күшімен 2023 жы­лы облыс әкім­діктері мен ҰКП қол­дауымен еліміз­дің 20 облысында өңірлік форумдар өткізілді. Солардың әрқайсысына алғаш рет өңір басшылары қатысып, әртүрлі тақырыптағы өзекті мәселелер көтерілді.

Ашылу салтанатынан кейін кезек панельдік сессияларға берілді. Алдымен «Орталық Азиядағы ОД мақсаттарына қол жеткізуді жеделдету үшін азамат­тық қоғаммен өңірлік әріптестікті қалып­тастыру» тақырыбында сессия өтті. Сондай-ақ дөңгелек үстел барысында «Халықтық дипломатия – ШЫҰ-ға мүше мемлекеттердің тиімді сыртқы саясатының кепілі» тақырыбы талқыланды.

Панельдік сессиялар «Әйелдер. Бейбітшілік. Қауіп­сіздік» тақырыбында жалғасты. Күні бойы өткен форумның екінші бөлігінде «Азаматтық қоғам инс­титуттары: Әділетті Қазақ­стан құру жолындағы шоғыр­ландыру» тақы­рыбында пікір­талас ұйым­дастырылды. Соны­мен қатар «Қоғамдық кеңес­тер инс­титутын дамыту» және «Орнықты даму мақсаттарына қол жеткізу барысындағы өңірлік аспект» тақырыбында панельдік сессиялар өтті.

Жалпы, қазіргі таңда еліміз­де 258 қоғамдық кеңес жұмыс істейді. Соның ішінде респуб­ликалық деңгейде – 35, жергілікті деңгейде – 223 (облыстар, Астана, Алматы, Шымкент қалалары деңгейінде – 20, қалалар, аудандар деңгейінде 203 кеңес бар.

Барлық деңгейдегі қоғамдық кеңес­тердің құрамына 3 830 ел азаматы кіреді. Оның ішінде жергі­лікті өкілді органдар жанындағы кеңестерге – 3 251, орталық мемлекеттік органдар жанындағы кеңес­терге – 456, квазимемлекеттік сектор субъектілері жанындағы кеңестерге – 123 адам мүше.

Сондай-ақ форум аясында «Аза­мат­тық бастама аймағы» әлеуметтік жобалар көрмесі өтті. Онда ҮЕҰ қызметінің бағыттары бойынша неғұрлым табысты іске асырылған әлеуметтік маңызы бар жобалар көрсетілді.

Форум қорытындысы бойынша елімізде азаматтық қоғамды дамытудың 2030 жылға дейінгі тұжырымдама­сына өзгерістер мен толықтырулар енгізілмек.