Таяуда Зерендіде 15 медицина қызметкеріне жаңа пәтер беріліп, мерейі өсті.
Ақ желеңді абзал жандарға 40 пәтерлі көпқабатты үйден қызметтік пәтерлердің кілті табысталып, жан жадыратарлық жаңалықтың куәсі болдық. Сөз арасында жаңа тұрғын үйді «Kokshe Building Service» серіктестігінің салғанын, жалпы ауданы 2 683,88 шаршы метрді құрайтынын айта кетелік.
Өңірдегі елді мекендерге медицина қызметкерлерінің жетіспейтінін ескерсек, алдағы уақытта осындай қамқорлық өзге жерлерде де қолға алынса, көптен бері көпшілікті толғандырып келе жатқан маңызды мәселе оңынан шешіліп қалар еді. Осы орайда Зеренді аудандық әкімдігі діттеген жерден шығып отырғанын айтқан ләзім. Бағдарлама бойынша жеті қызметкерге бір бөлмелі пәтер, алты қызметкерге екі бөлмелі пәтер, екі қызметкерге үш бөлмелі пәтер кілті ұсынылды. Пәтерге ие болғандардың арасында реанимотолог, трансфузиолог, нарколог, отоларинголог тәрізді мамандар бар.
– Мен аудан әкімінің грантына ие болып, өзім қалаған мамандықты игерген едім. Көп көмегі болды. Алған мамандығым бойынша туған жеріме келіп еңбек етемін. Медицина қызметкерлерінің мерейін асырған осы бір жақсылық жалғыз бізге ғана емес, халықтың денсаулығы үшін жасалып жатқан қамқорлық деп білемін, – дейді дәрігер Зүлфия Шолтышева.
Ілкімді іс-шараға қатысқан аудан әкімі Әсен Жақсылықов алдағы уақытта мүмкіндігінше баспана мәселесі біртіндеп шешіле беретінін жеткізді. Жылы да жайлы жаңа пәтерге ие болған ақ халатты абзал жандардың алғысы шексіз. Олар аудан басшыларымен бірге болашақ құтты ұяларымен танысып, қуанышын қойнына сыйғыза алмай жүр. Бұл күн жақсылық шарапатымен қалың қауымның есінде қалар ақжарылқап күн болды.
Ақмола облысы,
Зеренді ауданы