Түркістан қаласында үкіметтер басшыларының орынбасарлары Серік Жұманғарин мен Алексей Оверчуктың төрағалығымен Қазақстан Республикасы мен Ресей Федерациясы арасындағы ынтымақтастық жөніндегі үкіметаралық комиссияның 24-отырысы өтті.
Премьер-Министрдің орынбасары өз сөзінде екі ел арасындағы сындарлы диалогті құрудағы үкіметаралық комиссияның тиімділігін атап өтті.
Серік Жұманғарин Ресей Қазақстанның ірі сауда серіктесі екенін, өткен жылдың қорытындысы бойынша екіжақты тауар айналымы 9,5%-ға өсіп, 27 млрд долларға жеткенін атап өтті. 2023 жылдың қаңтар-тамыз айларының қорытындысы бойынша екі ел арасындағы сауда көлемі 17 млрд долларды құрады, бұл өткен жылдың сәйкес кезеңімен салыстырғанда 1,1%-ға жоғары.
Бүгінде ресейлік компаниялар Қазақстан экономикасына құйған қаржы көлемі бойынша басты инвесторлардың бестігіне кіреді, соңғы 17 жылда ресейлік инвестициялар ағыны 19 млрд долларды құрады. Өз кезегінде Ресейге құйылған қазақстандық инвестициялар 5,6 млрд доллардан асты.
Отырыста тараптар көлік-транзит саласындағы өзара іс-қимылды кеңейтудің маңыздылығын, оның ішінде екі ел аумағы бойынша транзиттік тасымалдарды ұлғайтудың, автожол инфрақұрылымын бірлесіп дамытудың және Қазақстан-Ресей шекарасындағы өткізу пункттерін жаңғыртудың маңыздылығын атап өтті. Отырысқа қатысушылар ауыл шаруашылығы саласында екі елдің ветеринарлық және фитосанитарлық қадағалау саласында ақпараттық интеграциялау жөніндегі жұмысты жалғастыру қажеттігіне назар аударды.
Ресей тарапы өз кезегінде цифрлық саладағы өзара іс-қимылды дамытуға қызығушылық білдірді.
«Цифрландыру саласындағы Ресей-Қазақстан ынтымақтастығының зор әлеуетіне сенімдіміз. Ақпараттық технологиялар жөніндегі комиссия шеңберінде өзара іс-қимылды жалғастыруға үміттіміз. Бүгінде ресейлік маркетплейстерде шамамен 120 мың қазақстандық жеткізуші тіркелген және олардың саны артып келеді. Осылайша елдің логистикалық инфрақұрылымы мен жергілікті кәсіпкерлік дамуда», деп атап өтті Алексей Оверчук.
Отырыста тараптар электр қуаты және мұнай-газ салаларындағы ынтымақтастықты одан әрі дамыту жоспарларын талқылады, бірқатар жаңа бастамаға назар қойды.
Әуе көлігі саласында да Қазақстан мен Ресей өзара әуе қатынасын кеңейтуге келісті. Атап айтқанда, тараптар «qazaq air» компаниясының Новосібір мен Челябі қалаларына ұшу санын арттыруға уағдаласты.
Жиынға қатысушылар Ресей тарапынан ағаш материалдарын шығаруға шектеу шаралары туралы да мәселе қозғады. 2024 жылдың 1 қаңтарына дейін Қазақстан-Ресей шекарасында аталған өнімді Қазақстан Республикасына шығару үшін тағы 4 өткізу бекетін белгілеу мәселесін пысықтау туралы келісімге қол жеткізді.
Сонымен қатар ресейлік тарап РФ Үкіметінің №312 қаулысына сәйкес қазақстандық компаниялардың меншігіндегі және аумаққа уақытша әкелінетін тауарлардың жекелеген түрлерін әкетуге рұқсат беру тәртібін таратпау мүмкіндігін қарастырады.
Отырыс соңында, Серік Жұманғарин екіжақты ынтымақтастықтың барлық спектрі бойынша өзара іс-қимылды одан әрі арттыруға дайын екенін жеткізді. Талқылау қорытындысы бойынша тараптар үкіметаралық комиссияның 24-отырысының хаттамасына қол қойды.