Бокстан алғаш рет 23 қазан-3 қараша күндері аралығында Астана қаласында жасөспірімдер және жастар арасында өткен Азия чемпионаты мәресіне жетті. Қазақстан боксшылары 9 алтын, 3 күміс, 8 қола жүлде алды, деп хабарлайды Egemen.kz boxingkazakhstan инстаграм арнасына сілтеме жасап.
Жарыс жеңімпаздары Халықаралық Бокс Федерациясы тарапынан (1-орын – 1000$, 2-орын – 500$, 3-орын – 250$) ақшалай сыйақы алды.
12 күн бойы өткен Азия чемпионатында арнайы номинациялар бойынша ең үздік боксшылар белгілі болды: Ең үздік жасөспірім қыз боксшы – Аяжан Сыдық (Қазақстан) Ең үздік жасөспірім ұл боксшы – Фужуки Юга (Жапония) Ең үздік жас қыз боксшы – Олтиной Сотимбоева (Өзбекстан) Ең үздік жас ұл боксшы – Төрехан Сабырхан (Қазақстан) Ең үздік төрешілер – Мариф Урдешев (Өзбекстан) және Мария Каваклиева (Болгария) Елорда төрінде өткен Азия чемпионатында жас боксшыларымызға Сидней Олимпиадасының чемпионы Ермахан Ибраимов, Лондон Олимпиадасының чемпионы Серік Сәпиев, Рио Олимпиадасының чемпионы Данияр Елеусінов, Олимпиаданың 2 мәрте күміс жүлдегері Әділбек Ниязымбетов, әлем чемпионы Махмұд Сабырхан және т.б қолдау білдірді.