Жоғарғы сот төрағасы Асламбек Мерғалиевтың қатысуымен жоғары сот органының кезекті жалпы отырысы өтті. Іс-шараға сот алқаларының төрағалары мен судьялары, ғалымдар, ғылыми-консультативтік кеңестің мүшелері, Бас прокуратура, Мемлекеттік кірістер комитеті мен адвокатураның өкілдері қатысты.
Күн тәртібінде нормативтік қаулылардың екі жобасы қабылданды. Алғашқы құжат – «Соттардың заңды тұлғалар мен жеке кәсіпкерлерді оңалту және банкроттық туралы заңнаманы қолдануының кейбір мәселелері туралы» деп аталады. Нормативтік қаулы жобасын Жоғарғы соттың судьялары Марина Боровик пен Ботагөз Ералиева таныстырды.
Қолданыстағы нормативтік қаулыда құжат мазмұнының 50 пайыздан көп бөлігі түзетілуге жатады. Осыған орай нормативтік қаулы қаралуға шығарылып отыр. Өйткені «Оңалту және банкроттық туралы» заңға 28 рет өзгеріс енгізілген. Тиісінше, бұл сот тәжірибесіне де өз әсерін тигізді. Құжатта соттылыққа, мерзімдерге, сотқа жүгіну негіздеріне, әдейі банкроттық пен субсидиарлық жауапкершілікке, борышкер мен әкімшінің құқықтық жағдайына, кредиторлар жиналысы мен комитетіне, олардың құқықтары мен міндеттеріне, кредиторлар талаптарының тізілімін жүргізуге және басқаларға қатысты материалдық және үдерістік құқық нормаларының жекелеген ережелері түсіндірілді.
«Соттардың төрелік заңнаманы қолдануының кейбір мәселелері туралы» НҚ жобасын Жоғарғы сот судьялары Маргарита Одинцова мен Жаңылдық Қашқынбаева таныстырды. Жоғарғы соттың төрелік заңнаманы қолданудың сот практикасын қорытуы судьялардың төрелік пен сот арасындағы құзыретті ажырату, қамтамасыз ету шараларын жүзеге асыру және дәлелдемелерді алуға жәрдемдесу, төрелік шешімдердің күшін жою, төрелік шешімдерді тану және мәжбүрлеп орындау мәселелері туындайтынын көрсетіп отыр.
Осы орайда нормативтік қаулылар жобасында көрсетілген әрбір жағдай бойынша түсіндірме берілді. Талқылау қорытындысы бойынша Жоғарғы сот судьялары нормативтік қаулылардың жобаларын қабылдау үшін дауыс берді. Жобалармен Жоғарғы сот сайтының «Заңнама» бөлімінде танысуға болады. Нормативтік қаулылардың мәтіні Қазақстан Республикасы нормативтік құқықтық актілерінің эталондық бақылау банкінде ресми жарияланады.
Жалпы отырыстың жұмысына Жоғарғы сот жанындағы Халықаралық кеңестің мүшесі, Ұлттық ғылым академиясының академигі, профессор Майдан Сүлейменов және ғылыми-консультативтік кеңестің мүшесі, экономика ғылымдарының докторы Жаннат Ертілесова қатысып, сараптамалық сүйемелдеу қызметін көрсетті. Жиында Асламбек Мерғалиев сот қызметін жетілдіруге қосқан үлесі үшін оларды «Қазақстан Республикасының сот жүйесіне 30 жыл» мерейтойлық медалімен марапаттады.