Алматыда каратэден Азияның ашық чемпионаты аяқталды. Бұл жарыста Жапония, Германия, Иран, Үндістан, Кувейт, Қырғызстан, Түрікменстан, БАӘ, Сауд Арабиясы және Ресей құрамалары күш сынасты.
Балуан Шолақ атындағы спорт сарайында өткен дүбірлі доданың жалпыкомандалық есебінде жерлестеріміз бас жүлдені олжалады. Барлығы 8 алтын, 8 күміс және 14 қола медальды иелендік. Жекелеген спортшылар жайында айтар болсақ, өз салмақ дәрежелері бойынша Ұлмекен Жалғас (68 кг), Белла Самашева (55 кг), Даяна Даренская (61 кг), Диас Анарбеков (+84 кг), Жоламан Биғабыл (60 кг), Ерсұлтан Тәңіберген (67 кг) және Диас Ұлбек (84 кг) сынды дүлдүлдер қарсылас шақ келтірмеді. Кумитэден ерлер құрамасы алтын алса, әйелдер қолаға қол созды. Жалпы есепте екінші және үшінші орындарды Иран (3+2+3) мен БАӘ-нің (2+0+0) каратэшілері еншіледі.
Соның алдында ғана жоғарыда аталған мемлекеттердің жастары Азия біріншілігінің жүлделерін сарапқа салған еді. Ол жарыста Қазақстанның өрендері Жапониядан ғана қалып қойып, екінші сатыға тұрақтады.