Келесі жылдың көктемінде аралас жекпе-жектегі ең белді промоушен – UFC-дің мерейтойлық турнирі өтеді деп жоспарланып отыр. Дәл қазіргі кезде 300 мәрте ұйымдастырылғалы отырған жарыста кімдердің өнер көрсететіні анықталып жатыр.
Аталған турнирде ең таңдаулы әрі санаулы ғана спортшылар күш сынасады. Үміткерлер қатарында біздің Шавқат «Номад» Рахмонов та бар. Әрине, 29 жастағы қандасымызға ондай құрмет тегін көрсетіліп отырған жоқ. Олай деуге негіз, осы күнге дейін 17 жекпе-жек өткізген Шавқат соның бірде-біреуінде жеңілген емес. Ол аз десеңіз, қазақтың қайсар ұлы барлық қарсыласын мерзімінен бұрын ұтты. Тарқатып айтсақ, өз бәсекелерінің тоғызын – бірінші және алтауын екінші кезеңде аяқтады. Тәжікстандық Фаридун Одилов (2018 жылы) пен америкалық Джефф Нил (2023 жылы) ғана үшінші раундқа дейін шыдады. Десек те Рахмонов соңғы сәтте олардың да осал тұсын тапты. «Номад» Одиловты ұрып жықса, Нилды қылқындырып тастады.
Көпшілік Шавқат Рахмоновтың 37 жастағы Гилберт Бернспен күш сынасқанын қалайды. Ол да өте мықты спортшы. Рио-де-Жанейроның тумасы 2012 жылдан бері осы спорт түрін серік етіп келеді. Сол кезден бері 28 мәрте октагонға шығып, 22 рет жеңіс тойын тойлады. 15 айқаста айқын басымдық танытты. 2021 жылдың басында Бернстің жартылай орта салмақ дәрежесі бойынша чемпиондық белбеуді иеленуге жақсы мүмкіндігі болды. Бірақ ол Лас-Вегаста өткен басты бәсекеде Камару Усманға есе жіберді. Соңғы рет бразилиялық файтер биыл мамыр айында Белал Мұхаммадпен айқасып, одан ұпай санымен ұтылды. Қазіргі кезде Гилберт UFC-дің рейтингінде төртінші орынды иеленді. Ал Шавқат Оңтүстік Американың оғыланынан бір саты төмен тұр.
Сонымен қатар спортсүйер қауым UFC 300 мерейтойлық турнирінде Конор Макгрегор (Ирландия) мен Майкл Чендлер (АҚШ), Ислам Махачев (Ресей) пен Чарльз Оливейра (Бразилия), Дастин Порье (АҚШ) мен Джастин Гэджи (АҚШ) және Хамзат Чимаев (БАӘ) пен Пауло Коста (Бразилия) арасындағы айқасты көруге айрықша құштарлық танытып отыр.