Қарулы күштер жылды қорытындылады

Отырысқа министрліктің бас­шы­­лық құрамы, Қарулы Күштер түр­­лерінің бас қолбасшылары, өңірлік қол­басшылықтар әскер­лерінің, Де­санттық-шабуылдау әскерлерінің, әскер тектерінің қолбасшылары, әс­кери бөлім­дер­дің, аумақтық қорға­ныс бри­га­даларының командир­лері, қор­ғаныс істері жөніндегі депар­та­менттері мен әскери оқу орын­да­рының бастықтары қатысты.

Министр қорғаныс саласының  барлық қызметі Жоғарғы Бас қолбасшы қойған міндеттерді орындауға бағытталғанын атап өтті. Ар­мияны қару-жарақпен жә­не техникамен жарақтандыру, әс­ке­­ри инфрақұрылымды салу және жөн­­деу, әскерлерді материалдық-техни­калық құралдармен қамта­масыз ету жұмыстары іске асырылды. Биыл қорғаныс саласы Президенттің қаты­суымен Бүкіл­армиялық кеңес пен «Батыл тойтарыс-2023» оқу-жат­тығуларын өткізді, бұл ретте Мем­лекет басшысы әскерлердің даярлық деңгейін жоғары бағалады.

Президенттің тапсырмасымен Әскери-патриоттық тәрбие тұжы­­рымдамасы әзірленіп, оның жеке бақы­лауымен әскери қызмет­ші­лер­дің әлеуметтік мәртебесі мәсе­лелері шешіліп келеді.

– Биыл ұшқыштар құрамы мен жоғары оқу орындарындағы аза­маттық оқытушылардың жалақысы орта есеппен – 60, сондай-ақ әскери дәрігерлердің жалақысы 40 пайызға өсті, осылайша олар азаматтық сала медициналық мекемелердегі жалақы деңгейіне жеткізілді. 2024 жылдан бастап әскери атақтар үшін төленетін үстемеақыны 30 пайызға көтеру көзделген. Барлық әскери қызметшілердің жалақысын көтеру мәселелері де пысықталып жатыр. Тұрғын үй төлемдерінің деңгейі ұдайы өсіп келеді, – деді Қорғаныс министрі.

Генерал-полковник Р.Жақсы­лықов бұдан бөлек басқару орган­дары мен сеніп тапсырылған бөлім­шелер жұмысының сапасына назар аударды.

– Бөлімшелерді жеке құраммен толықтыру мәселелері шешуді талап етеді. Офицерлер мен сержант­тардың кәсіби деңгейін арттыру бойынша жұмыс істеу қажет. Бұл аспектілер әскери ұжымдардағы моральдық-психологиялық ахуалға және құқықтық тәртіптің жай-күйі­не тікелей әсер етеді. Қару-жарақ пен әскери техниканы жарамды және жауынгерлік әзірлікте ұстау, инфрақұрылымдық нысандарды күтіп ұстау мен оларға қызмет көр­сетуді жетілдіру маңызды, – деп атап өтті ол.

Отырыста Қорғаныс министрі­нің бірінші орынбасары – Бас штаб бастығы, генерал-лейтенант Марат Құсайынов есептік кезеңдегі әс­кер­лердің жауынгерлік және жұ­мыл­дыру дайындығының жай-күйі туралы баяндады. Дәстүрлі және гибридті күрес әдістері кеңі­нен қолданылатын қазіргі за­манғы қарулы қақтығыстардың ерек­шеліктеріне тоқтала келіп, Қарулы күштер әскери агрессия жағдайында қарсыласқа оңтайлы қарсы тұруға әзір болуы керек екенін атап өтті.

Отырыс барысында Қорғаныс министрінің орынбасарлары өз ба­ғыт­тары бойынша жұмыс нәти­желері жөнінде есеп  берді. Олардың баяндамаларында әскери және құқықтық тәртіп, Қарулы күштерді техникалық, тылдық, медициналық қамтамасыз ету және пәтерлерді пайдалану мәселелері жан-жақты қамтылды.

Алқа отырысы қорытынды­сы бойынша Қорғаныс министрі әс­керлердің жауынгерлік қабілеті мен жауынгерлік әзірлігін одан әрі арттыру, оларды техникалық жарақ­тандыру, тылдық және моральдық-психологиялық жағдайды қам­тамасыз ету жөнінде бірқатар мін­дет­ қойды. Әскери басқару жүйе­­сін цифрландыру үдерісін жедел­дету арнайы тапсырылды.

Басшылық құрам оқу-әдіс­те­мелік жиынның қорытындысын шығар­ды. Қарулы күштер арасын­дағы жауын­герлік жарыстың жеңімпазы атағын Әуе қорғанысы күштері алды. Әскер тектері мен өңірлік қолбасшылық­тар арасында Десанттық-шабуыл әскерлері бірінші болса, екінші орын­ды ӘШҚҚ әскерлері, үшінші орынды Әскери-әуе күштері иеленді.

2023 оқу жылының қорытын­дысы бойынша қызметтегі жетіс­тіктері үшін 18404 әскери бөлі­мі­нің командирі, подполковник Алмас Төлегенов еліміздің тұң­ғыш Қорғаныс министрі, Халық қаһарманы, армия генералы Сағадат Нұрмағамбетовтің төсбелгісіне ие болып, кубокпен марапатталды.