Бикен Римова атындағы Талдықорған драма театры Ашғабад қаласында өтетін «Бақыт дәуіріндегі театр өнері» фестиваліне қатысады. Жетісулықтар – рухани додаға ел ішінде жолдама алған тұңғыш өнер ұжымы.
Қараша айының ортасында өтетін өнер бәйгесін Түрікменстанның Мәдениет министрлігі мен ТҮРКСОЙ Халықаралық ұйымы бірлесіп ұйымдастырып отыр. Ондағы мақсат ұлттық театр өнерін дамыту және театрлардың шығармашылық бастамаларын ынталандыру екенін алға тартуда. Сондай-ақ түркі халықтарының басын бір шаңырақ астына қосып, мәдениет үндестігін насихаттау. Неге десеңіз, театр әртістері өзара шығармашылық байланыста болып, ел мен жердің мәдени өміріне бойлауы маңызды. Осылайша, әлемдік сахнаға жол ашылмақ.
Аталған фестивальдың басты талаптарының бірі қатысушы театрлардан ұсынылған қойылым классикалық немесе ұлттық шығармадан болуға тиіс. Өңірлік театр қазақ әдебиетінің классигі, ұлы жазушы Мұхтар Әуезовтің «Қорғансыздың күні» шығармасының желісімен сахналанған қойылымды ұсынып, қазақ елінің намысын қорғайды. Спектакльдің қоюшы-режиссері – Фархад Молдағали.
«Қорғансыздың күні» шығармасы Бикен Римова атындағы Талдықорған драма театрының репертуарындағы шоқтығы биік қойылымдардың бірі. Спектакльде автор байырғы қазақ ауылындағы кедейлер өмірінің бір көрінісін тамыр-тереңінен қопарып әкеліп, қорғансыз жандардың тұрмыс-тіршілігіндегі жан түршігерлік азап пен ауыртпалықты аса шыншылдықпен әсерлі баяндайды.
Халықаралық фестивальға Татарстан, Қырғызстан, Өзбекстан, Тәжікстан, Түрікменстан мемлекеттерінен театр ұжымдары қатысады. Айта кету керек, Бикен Римова атындағы Талдықорған драма театры – елімізден алғаш рет қатысатын облыстық театр.
Жетісу облысы