Тарихы терең Тараз шаһарда А.Тоқпанов атындағы облыстық қазақ драма театры мен Жамбыл облыстық орыс драма театры сынды екі театр ұжымы бар. Алайда екі театрға - бір сахна. Өнер мен мәдениетті өркендетуді жоспарлаған талай әкім аймақты тізгіндегенмен мәселе шешілмеді. Бұл туралы «Egemen Qazaqstan» газетінің бүгінгі санында Жамбыл облысындағы меншікті тілшіміз Табиғат Мұсылманқұл «Өңір мәдениетіне тың серпін керек» мақаласында тарқата жазды.
Тілші көрші Шымкент қаласында 7-8 театрдың жеке-дара отауы бар екенін айта келіп, Тараз театрларына мұндай бақ бұйырмағанына назар аудартады.
Аталған өңірдегі тілшіміз Тәуелсіздік алған 30 жыл ішінде Батыс Қазақстан, Түркістан, Қарағанды, Қостанай, Шығыс Қазақстан, Жетісу облыстары мен Шымкент қаласында жаңа театр ғимараттары салынды. Ендігі кезекте Тараз қаласында да заманауи театр ғимаратын салу уақыт талабы болып отырғанын алға тартады.
Мақалада облыстық мәслихат депутаты Фарида Жүнісованың жастарды мәдениетке баулу, аға буынның уақытын қызықты үйлестіру ісінде қос театрдың жалғыз сахнаны кезектесе қолдануы кедергі келтіреді деген пікірі алынған.
«Біздің өңірде 1967 жылы пайдалануға берілгеннен бері қазақ және орыс театры ұжымдары бір ғимаратта 56 жыл бірге жұмыс істеп келеді. Екі театрдың бір ғимаратта отырып еңбек етуі біріншіден, екі ұжымның да шығармашылық жұмыстарының сандық және сапалық көрсеткіштерінің дамып, жақсаруына кері әсерін тигізеді. Өйткені жоспарланған қойылымдар мен мәдени іс-шаралар өткізу үшін театр сахнасы мен көрермендер залын қазақ және орыс драма театрлары бір-бір аптадан кезекпен пайдаланып отыр», дейді Фарида Жүнісова.
Автор саладағы өзге де күрмеулі мәселелерге тоқталған. Оның ішінде театрға кәсіби мамандардың келмеуі - өңірде жастарға әлеуметтік жағдайдың жасалмауымен байланысты деп түсіндіреді.
«Театр мамандарының тапшылығының орын алуының басты себебі – Тараз қаласында жас мамандардың әлеуметтік мәселелерін жақсарту мәселесі шешімін таппай отырғандығында. Осы себепті театр қызметкерлерінің жалақысын көтеру, жас әртістердің ай сайынғы пәтер ақыларын бюджет есебінен төлеуге мүмкіндік жасау және олардың арнайы жеңілдетілген бағдарлама бойынша пәтер алуларына ықпал ету мәселесі шешімін табуы қажет», дейді автор.
Жамбыл облысындағы өнер мен мәдениеттің ақсап тұрған тұстарын саралаған материалды газетіміздің бүгінгі санындағы «Өңір мәдениетіне тың серпін керек» мақаласынан толық оқи аласыздар.