Үкіметте Премьер-министр Әлихан Смайыловтың төрағалығымен өткен кеңесте Алматы және Қонаев қалаларының арасында Алатау шаһарының (G4 City) құрылысы жобасын іске асыру мәселелері талқыланды.
Жиында орталық мемлекеттік органдардың және өңір әкімдігі басшыларының қатысуымен қаланы дамыту тәсілдері қаралды. Жоспарға сәйкес бұл отандық және шетелдік инвестицияларды тарта отырып, жаһандық стандарттар бойынша жұмыс істейтін Халықаралық бизнес-хабқа айналуға тиіс. Бұл ретте Дубай, Сингапур, Тяньцзинь, т.б. сияқты әлемнің әйгілі орталықтарын құру тәжірибесі негізге алынбақ.
Атап айтқанда, Алматы облысындағы Алатау қаласын дамыту Қытаймен, Орталық Азия елдерімен сауда және инвестициялық өзара іс-қимыл деңгейін арттыруға, бірқатар жаңа өндірістік және коммерциялық жобаны іске қосуға, түрлі салада озық тәжірибені енгізуге мүмкіндік береді. Осы мақсатта инвестициялар тарту және кәсіпкерлік қызметті жүргізу үшін қолайлы жағдайлар жасалып, ынталандыру шаралары көзделеді. Бұл соның ішінде салық және кедендік артықшылықтарға да қатысты.
Сонымен қатар Алатау қаласының аумағында ерекше құқықтық режімді, оның ішінде АХҚО құқығын енгізу мүмкіндігі қаралады. Премьер-министр бұл жұмыстарды іске асыру кезінде халықаралық тәжірибені ескеріп, тиімділігі жоғары шараларды қолдану қажеттігін атап өтті. Бұған қоса бизнеспен өзара іс-қимыл кезінде, атап айтқанда, мемлекеттік-жекеменшік әріптестігі тетігі арқылы қажетті инфрақұрылым құрылысын жандандыру қажеттігі айтылды.