Түркістанда Туризм және спорт министрлігінің мұрындық болуымен «Kazakh Tourism» ҰК» АҚ және облыс әкімдігі «Travel fest креативті туризм» атты бірқатар маңызды іс-шара ұйымдастырды.
Креативті туризм саласы бойынша қоршаған ортаны қорғау тақырыбына арналған «Эго-дан эко-ға дейінгі» экологиялық фотосуреттер көрмесі ашылды. Жобаға қатысушылардың жұмысы негізінен табиғатқа бейжай қарамауды насихаттайды. Сонымен қатар Халықаралық туризм және меймандостық университетінде құнды дәрістер мен семинарлар өтіп, форум аясында байқау жеңімпаздары марапатталды.
Сондай-ақ «Karavansaray» кешені аумағында әлемдегі ірі қалалар өмірінің ажырамас бөлігіне айналған, әсіресе елдің креатив индустриясының негізі саналатын «Street Performance Fest» іс-шарасы өтті. Дәл сол күні Түркістан қаласының тұрғындары мен қонақтары breaking, hip hop, all styles стильдері бойынша би фестивалін тамашалады.
Іс-шара аясында Түркістан облысы бойынша экологиялық автотур ұйымдастырылып, оған Қазақстан, Ресей, Өзбекстан, Қырғыз елінен келген кәсіби автосаяхатшылар қатысты. Олар оңтүстік өңірдегі Ақмешіт үңгірлері, Леңгір (Біркөлік), Ақсу-Жабағылы, Қазығұрт, Сарыағаш, сондай-ақ Арыстан баб, Сауран, Қожа Ахмет Ясауи, Күлтөбе сияқты табиғи орындары мен тарихи-мәдени көрікті жерлерімен танысты. Сонымен қатар Түркістан қаласының Конгресс-орталығында «Kazakhstan Creative Tourism Forum- 2023» креативті туризм бойынша ауқымды форум ұйымдастырылды.
«Форумның мақсаты – саяхатшылардың жаңа буынын қалыптастыру, туристік ұйымдардың бәсекеге қабілеттілігін арттыру, сондай-ақ елімізде креативті кластерлер мен креативті индустриялар орталықтарын құру және дамыту, елімізде туризмнің барлық түрін дамыту және ілгерілету мақсатында сарапшылар қауымдастығын бір алаңда жинау», дейді ұйымдастырушылар.
Түркістан – түбі бір, тарихы ортақ түркі халықтарының түп қазығы, рухани ордасы. Қала облыс орталығына айналғалы жыл санап көркейіп келеді. Түркістан түркі халықтарының ғана емес, дүние жүзіндегі көненің көзі саналады. Мұнда жыл сайын әлемнің түкпір-түкпірінен және еліміздің әр аймағынан миллиондаған турист келеді.
«Президенттің креативті индустрияны әр облыс орталығында дамыту туралы тапсырмасына сәйкес Түркістанда креативті индустрияның үлкен фестивалі өтті. Бұл бағытты дамыту мемлекет тарапынан талантты жастарды қолдауда өте маңызды. Аталған іс-шаралардың негізгі мақсаты – өңірдегі экономикалық белсенділікті арттыру және жаңа жұмыс орындарын ашу», дейді Туризм және спорт министрінің орынбасары Ержан Еркінбаев.
Түркістан – ежелден сауда-саттықтың ортасы, руханият ордасы. Онда ұлт өркениетінің салт-дәстүрі мен қолөнері сақталған. Сондықтан да оның туристік әлеуеті жоғары. Әсіресе туризм кластерінің басым бағыты көлік инфрақұрылымы қолайлы жолға қойылған. Түркістан қаласы – тарихи туризмнің алтын ұясы. Онда туристерге толықтай сапалы қызмет көрсете алатын орындар да жетерлік.
Тарихи туризм ошақтары – табиғаты әсем, шежірелі өлке. Облыстағы ЮНЕСКО-ның мәдени мұралар тізіміне енгізілген Қожа Ахмет Ясауи кесенесі, көне Отырар, Сауран қалашықтары, Арыстан баб, Бәйдібек ата, Домалақ ана кесенелері мен Ақмешіт үңгірі, Түлкібас аудандарының қайталанбас әсем табиғаты, Ақсу-Жабағылы, Қаратау қорықтары, Сайрам-Өгем мемлекеттік ұлттық табиғи паркі – талай саяхатшыларды тамсандырған мекендер әрі туристерді магнитше тарта бермек.