Тігіншілер тілегін тыңдады

Қазіргі таңда тігін фабрикасында 100-ден аса адам жұмыспен қамтыл­ған. Тігін цехы негізінен мемлекет­тік және шетелдік тапсырысты орындайды. Бүгінде ресейлік теміржол қызметкерлеріне арнайы киімдер тігіп жатыр. Қызметкерлердің орташа еңбекақысы 150-200 мың теңгені құрайды. Ондағы жұмысшылардың 95 пайызы нәзік жандар.

Кездесуде халық қалаулысы Максим Рожин гендерлік теңдікті қамта­ма­сыз ету, қыз-келіншектердің құқығын қорғау және отбасылық құндылықтарды нығайту мәселесі әрқашан Мемлекет басшысы Қасым-Жомарт Тоқаевтың назарында екенін атап айтты.

«Президент ана мен баланы қор­ғау, отбасы тәрбиесі мен отбасылық құндылықтар мәселесіне ерекше көңіл бөліп келе жатыр. Айналып келгенде, мемлекеттің де басты тірегі бақыт­ты, тату-тәтті отбасы. Сондықтан отба­­сындағы ізгілік, адамгершілік, сый­лас­тық қарым-қатынасты берік сақтау маңызды. Мұның құндылығын сіздер­ден артық ешкім білмейді. Қазақтың қыз­дары отбасын да, Отанын да тең тербеп отыр», деді мәжілісмен.

Кездесу барысында фабрика өкіл­дері өздерінің жұмыстары жайында айтып, шикізатқа байланысты өзекті мәселелер барын алға тартты, толған­дырған сұрақтарын қойды.

«Қазіргі заманғы нарықтық сауда жүйесінің міндеті – сөрелерде отандық өнімдердің тұрақты түрде қолдау тауып, сатылымда болуы өте маңызды. Отандық кәсіпорындар мемлекет тарапынан қолдау тауып та келеді. Бірақ біз шығаратын өнімдердің шикізаты Қазақстанда жоқ. Сондықтан басқа елден алдыртамыз. Ал сол тауарлардың 30 пайыз салығын біз кеден бекеттеріне төлеуге мәжбүрміз», дейді фабрика өкілі Әмина Қанашаева.

Тараптар өңірдегі өзекті мәселелерді және оларды заң жүзінде шешу жолдарын талқылады. Мәселенің анық-қанығына жеткен мәжілісмен бұл мәселені өз бақы­лауына алатынын жеткізді.

Жұмысшылар өңірде мұндай тігін фабрикалар кейінгі уақытта қарқынды дамып келе жатқанын атап өтіп, мем­лекеттік сатып алулар заңы аясында шетелдік емес, отандық өнімнің неғұр­лым көбірек сатылу тетіктері қарас­тырылса деген тілектерін білдірді.

Алматы облысы