Елордада Оңтүстік Кореяда өтетін IV қысқы Жасөспірімдер олимпиадасына отандық спортшыларды салтанатты түрде шығарып салу рәсімі болды. Төртжылдықтың басты жарысы 19 қаңтар мен 1 ақпан аралығында Канвон провинциясының Каннын қаласында өтеді.
Салтанатты іс-шараға Туризм және спорт министрі Ермек Маржықпаев, Ұлттық олимпиада комитетінің өкілдері, спорт ардагерлері, федерация басшылары мен мемлекеттік жаттықтырушылар қатысып, IV қысқы Жасөспірімдер олимпиадасының ашылу рәсімінде ту ұстайтын спортшыларға ел байрағы салтанатты түрде тапсырылды. Жасөспірімдер олимпиадасының ашылу салтанатында еліміздің байрағын шорт-тректен ел чемпионы, спорт шеберіне үміткер Ерасыл Шыңғысхан және конькимен жүгіру спортынан спорт шебері, сондай-ақ ел біріншілігінің жеңімпазы Кристина Шумакова алып шығады. Өз кезегінде Ерасыл Шыңғысхан ту ұстаушы ретінде көпшіліктің алдына шығып, салтанатты түрде ант берді.
Жасөспірімдер олимпиадасында Қазақстанның жасөспірімдер құрамасы спорттың 5 түрінен бақ сынап, 55 медаль жиынтығын сарапқа салады. Қысқы ойындарда ел намысын 42 спортшы биатлон, керлинг, конькимен жүгіру, шорт-трек, шаңғы жарысы, трамплиннен секіру, тау шаңғысы, шаңғы қоссайысы, фристайл могул және шайбалы хоккей спорт түрлерінен қорғайды. Салтанатты жиында министр сөз сөйлеп, спортшыларға сәттілік тіледі.
«Құрметті спортшылар, барлық кезеңнен сүрінбей өтіп Оңтүстік Кореяның Канвон қаласында өтетін IV қысқы Жасөспірімдер олимпиадасына еліміздің намысын қорғауға аттанғалы тұрсыздар. Әлемдегі жетекші спортшылардың қатарына кіре алдыңыздар», деді Е.Маржықпаев.
Министрдің мәліметінше, еліміз тәуелсіздік алғалы Жасөспірімдер олимпиадасында 29 медаль жеңіп алды, оның бесеуі – қысқы олимпиададан.
«Елімізде қысқы спорт түрлерінде жеңіспен өрілген жақсы дәстүр бар. Бүгінде тек елімізге ғана емес, бүкіл әлемге танымал даңқты спортшыларымыз халықаралық қысқы жарыстарда өнер көрсетіп, үнемі жүлдегерлер қатарынан көрініп жүрді. Олардың қатарында шаңғышы Владимир Смирнов, конькимен жүгіруші Людмила Прокашева, биатлоншы Елена Хрусталева, мәнерлеп сырғанаушылар Денис Тен, Елизавета Тұрсынбаева бар. Сіздер бұл ойындарға қатыса отырып, зор тәжірибе жинайсыздар. Осы құнды тәжірибе болашақта пайдалы болатыны сөзсіз, өйткені сіздер Қазақстан ұлттық құрамасының резерві саналасыздар. Бүгін біз дәстүрлі шығарып салу рәсіміне қатысып отырмыз. Сіздерге алдағы жарыста тек сәттілік тілеймін. Осыған дейін жиған бар шеберліктеріңізді, қабілеттеріңізді паш етіп, жоғары нәтиже көрсетулеріңізге және жеке рекордтарыңызды жаңартуға тілектеспін! Біз сіздерге жанкүйер болып, жеңіс тұғырынан көрінулеріңізге шын ниетпен тілеулес боламыз», деді министр.
Жарыстың ашылу салтанаты 19 қаңтарда Каннын қаласындағы «Gangneuung Oval» спорт кешенінде өтеді. Бұл нысанда конькимен жүгіру спортынан жарыстар ұйымдастырылады. Ал Олимпиаданың жабылу салтанаты 1 ақпан күні сол «Gangneung Olympic Park» спорт кешенінде өтеді деп жоспарланған.
Министрліктің мәліметінше, Канвон-2024 қысқы Жасөспірімдер олимпиадасына 14 пен 17 жас аралығындағы әлемнің 70 елінен 1 800 спортшы қатысады. Мұнда 7 спорт түрінің 15 бағдарламасы бойынша 81 медаль жиынтығы сарапқа салынады.