Бүгінде Өзбекстанның бас шаһары Ташкентте ерлер мен әйелдер арасында Азия чемпионаты өтіп жатыр.
Аталған жарыста 34 мемлекеттен келген 200-ге тарта үміткер бақ сынап жатыр. Кеше Қазақстан құрамасының қоржынына бір жүлде түсті. 67 кг салмақтағы Сайрамкез Ақмолда қоссайыстың қорытындысы бойынша 292 кг (126+166) зілтемірді еңсеріп, күміс медальды мойнына ілді. Қандасымыз тек Ри Вон Джиден ғана қалып қойды. Солтүстік Кореядан келген спортшы 317 (137+180) кг салмақты бағындырды. Таиландтың өкілі Травата Ратфета қолаға қол созды. Ол 286 кг (128+158) салмақты тік көтерді. Бұл бәсекелер 10 ақпанға дейін жалғасады.
Құрлық чемпионаты барысында Олимпия ойындарының жүлделері сарапқа салынатындықтан, оны тамашалау үшін Халықаралық ауыр атлетика федерациясының президенті Мұхаммад Хасан Джалуд, Азияның президенті Мухаммад Юсуф Аль Мана және тағы басқа лауазым иелері Ташкентке арнайы ат басын бұрды.