Л.Н.Гумилев атындағы Еуразия ұлттық университеті бакалавриат деңгейіндегі оқу үдерісіне біршама өзгеріс енгізіп жатыр. 2024-2025 оқу жылынан бастап 1-курс студенттері жасанды интеллект саласын оқып, ғылыми зерттеулер жүргізеді.
Жаңа оқу жылында университет барлық педагогикалық бағыт бойынша бакалавриат деңгейіне арналған «Minor» бағдарламасын енгізеді. Студенттер инклюзивті білім берудің үш қосымша пәнін оқиды: «Инклюзивті сыныпта оқытудың әмбебап дизайны», «Ерекше білім беруді қажет ететін баланың отбасына психологиялық-педагогикалық қолдау көрсету» және «Ерекше білім беруді қажет ететін тұлғаларды тьюторлық қолдау». Осы бағытта университет қызметкерлері ерекше білім беру қажеттіліктері бар студенттермен жұмыс істеу бағытындағы оқытушыларға арналған әдістемелік ұсынымдар әзірледі.
– Жыл сайын техникалық, инженерлік және педагогикалық мамандықтарды меңгеруге ниет білдіргендер саны артып келеді. Біздің университет еңбек нарығының қажеттіліктеріне және технологияның дамуына сәйкес білім беру бағдарламаларын үнемі жетілдіреді әрі жаңаларын әзірлейді. Жұмыс берушілермен, шетелдік университеттермен, ірі компаниялармен бірлесіп, еңбек нарығының сұранысы бойынша жаңа инновациялық білім беру бағдарламаларын әзірлеп жатырмыз. Қазір 40-қа жуық инновациялық бағдарлама бар. Олардың 18-і педагогикалық, инженерлік және техникалық бағыттарды қамтиды. Оқу орнында оқыту үдерісі үш тілде жүргізіледі және 45 білім беру бағдарламасы ағылшын тілінде қарастырылған. Сондай-ақ университетіміз қысқартылған білім беру бағдарламасы бойынша үш жыл математика пәні мұғалімдерін даярласа, биыл «Ғарыштық техника және технологиялар» білім беру бағдарламасы бойынша докторантура ашылды, – деді университеттің Академиялық мәселелер департаментінің директоры Байжұман Қашқынбай.
Ұлттық университетте педагогикалық, инженерлік, техникалық бағыттағы жоғары білікті кадрларды даярлауға көп көңіл бөлінеді. Қазіргі таңда оқу ордасында осы салаларда үш деңгей бойынша 12 мыңнан астам студент білім алып жатыр. 244 білім беру бағдарламасының 100-і педагогикалық, инженерлік-техникалық бағыттар бойынша қарастырылған.
Дарынды жастарды ғылымға тарту мақсатында 2024-2025 оқу жылынан бастап бакалавриат бағдарламаларына екі жаңа модуль енгізіледі. Олардың бірі ғылыми компонентті қарастырады. Студенттер оқудың бірінші жылынан зерттеу жұмыстарымен айналысады. Екіншісі – модуль жасанды интеллектіні зерттеуге бағытталған. Студенттер осы бағытта білімін кеңейтіп, озық цифрлық технологияларды меңгереді деп күтіліп отыр.
Нұрдәулет КӘРІБАЙ,
Қожа Ахмет Ясауи атындағы халықаралық қазақ-түрік университетінің 2-курс студенті