Қоғамда ажырасу оқиғаларының көбеюімен алимент төлеушілер қатары да артып келеді. «Алимент төлеуге міндеттілер» деген дұрыс шығар. Өйткені міндетті болғанымен, олардың бәрі бірдей «төлеуші» емес. Сондықтан прокуратура қызметкерлері алименттен қашқандарды анықтап, заң аясында күштеп төлеттіруге мәжбүр.
Жергілікті атқарушы органдармен және сот орындаушыларының бірлескен жұмысы арқасында Алматы қалалық прокуратурасы былтыр мыңнан астам жұмыссыз алимент төлеушіні анықтап, есепке алды. Жұмыссыз болғандықтан, алиментті де төлемей жүргені белгілі. Олардың 657-сі жұмысқа тұрғызылды.
Дегенмен, шын мәнінде, бұлардың бәрін бірдей жұмыссыз деу қиын. Себебі көбі «Яндекс.GO» қосымшасы арқылы жолаушы тасымалдау қызметімен айналысып, жасырын табыс тауып жүр. Прокуратура органдары алименттен қашқан осындай 150-ден астам борышкерді анықтады.
2023 жылы 14 борышкерге қатысты қылмыстық істер тіркеліп, олардың ішінен 5 борышкер қылмыстық жауапкершілікке тартылды. Қазіргі таңда сотқа дейінгі тергеп-тексеру органдарының өндірісінде 9 қылмыстық іс бар.
Сонымен қатар алимент өндіру бойынша сот шешімін орындамаған 112 борышкер Әкімшілік құқық бұзушылық туралы кодекстің 669-бабымен әкімшілік жауапкершілікке тартылды.
Жалпы, Алматы прокуратурасының мұрындық болуымен 2023 жылғы 16 мың бала тиесілі 2,5 млрд теңгеден астам алимент бойынша қарыздар төленді. Бұл бағытта жұмыстар жалғаса береді.