Елімізде коронавирус инфекциясына қатысты эпидемиялық ахуал баяғыда тұрақталғанымен, Алматы қаласында жыл басынан бері 217 адамның коронавирус жұқтырып алғанын арнаулы лаборатория анықтап отыр. Індетке шалдыққандардың 14 пайызы – 14 жасқа дейінгі балалар.
Осы мәселеге орай, Өңірлік коммуникациялар қызметінде өткен брифингте Алматы қалалық санитарлық-эпидемиологиялық бақылау департаментінің басшысы, қаланың бас мемлекеттік санитарлық дәрігері Қасымхан Алпысбайұлы кейінгі 7 күнде ауру жұқтырғандар саны 1,5%-ға өскенін, 42 тұрғыннан коронавирус табылғанын мәлімдеді. Оның алдындағы аптада зертхана 29 адамда вирус бар екенін растаған еді. Сондықтан эпидемиологтерге инфекцияның алдын алуда вакциналаудың маңызын қайта еске салуға тура келеді.
«Коронавирус індетінің алдын алу үшін маска тағып, жұрт көп жиналатын жерлерге барудан, қашықтық сақтап, қызуы жоғары науқастардан абай болу керек. Кеселдің алдын алу үшін үй-жайды үнемі желдетіп, тазалық сақтап, жеке гигиена ережелерін сақтаған жөн», дейді қаланың бас санитарлық дәрігері.
Департамент мәліметтеріне сүйенсек, жыл басынан бері тіркелген 217 жағдайдың ішінде ауруханаға өздігінен келіп қаралған – 190, профилактикалық мақсатта тексерілген – 17, эпидемиологиялық көрсеткіштер бойынша 10 адамның коронавирус жұқтырғаны аян болды.
Жыл басынан бері Covid-19 инфекциясын жұқтырғандардың жас ерекшелігіне тоқталатын болсақ, бір жасқа дейінгі балалар – 21, 14 жасқа дейінгілерде – 30, 15-19 жастағы жасөспірімдер арасында – 8, 20-39 жас аралығындағылардан – 76, 40-59 жас аралығындағы адамдардан – 34, 60 жас және одан жоғары жастағылар арасында 69 жағдай тіркелді.
Тағы бір тоқтала кететін мәселе – қызылша эпидемиясы. Қасымхан Алпысбайұлының айтуынша, Алматы қаласында 2023 жылдың наурыз айынан бері зертхана растаған 5 563 жағдай тіркелді. Оның ішінде 14 жасқа дейінгі балалар арасында 4 011 (72,1%), 15 жастан 18 жасқа дейінгі жасөспірімдер арасында – 217 (3,9%) және ересектер арасында 1 335 (23,9%) адам қызылша жұқтырғаны белгілі болды.
Әсіресе балалар арасында қызылшаның өршуіне бірінші кезекте екпеден бас тарту себеп болып отыр. Бұған қоса вакциналаудан медициналық босатылғандар мен егу жасына жетпегендіктен екпе салдырмағандар арасында да қызылша жұқтыру көп тіркеліп жатыр.
Өз кезегінде санитарлық-эпидемиологиялық қызмет мамандары қол қусырып, қарап отырған жоқ. Қалада қызылшаға, паротит қызамығына қарсы халықты қосымша жаппай иммундау жұмысы жалғасып жатыр. Мәселен, 2023 жылғы 6 қараша мен 2024 жылғы 14 ақпан аралығында Алматыда қызылшаға қарсы ҚЖИ шеңберінде барлығы 156 794 адамға екпе жасалса, оның ішінде 6 айдан бастап 10 ай 29 күнге дейінгі 12 201 бала, 2 жастан 4 жасқа дейінгі 77 807 бала, 8 676 медицина қызметкері мен бұрын қызылшаға қарсы жоспарлы екпе алмаған 58 110 бала қайта вакциналаудан өтті.
Балаларды жоспарлы түрде екпе салу тұрғылықты жері бойынша қаланың емханаларында тегін жүргізіледі. Вакциналау үшін ДДҰ сертификаттаған және Қазақстанда тіркелген, қызылшаға, қызамыққа, эпидемиялық паротитке қарсы аралас вакцина қолданылады.
АЛМАТЫ