Бала кезімнен нақты ғылымға қызықтым. Математиканы жақсы көріп өсіп, тіпті осы пәннің мұғалімі де болғым келді. Бірақ әкем «Қаржы және Кредит» мамандығын таңдауға кеңес берді. Ол менің математикалық және аналитикалық қабілетімнің аталған салада көмекке келетінін, сонымен қатар жақын арада елімізде қаржы саласының үлкен даму қарқынына ие болатынын, сөйтіп жас мамандар үшін тың мүмкіндіктер ашылатынын да айтты. Осылайша, мен қаржылық білім алдым.
Бұған дейін жақындарымның ішінде ешбірі қаржы саласында қызмет етпеген. Еуропалық қайта құру және даму банкінің серіктестік даму бағдарламасы арқасында алғаш рет коммерциялық банкке жұмысқа орналастым. Бұл бағдарлама маған қаржылық талдаудың және кәсіпкерлерге несие беру ерекшеліктерін түсінудің өте жақсы негізін қалыптастырды.
Жұмыс барысында жаңа тәуекелдерге, жаңа қиындықтарға әркез тап боламыз. Міндеттерді табысты шеше алу үшін әрдайым дамып, жетіліп отыру, білім алудан жалықпау өте маңызды. Соңғы уақытта болған күрделі әрі ауқымды кейстердің бірі – ЦентрКредит Банкі мен ECO Center Bank-тің бірігуі болды. Біз бұл үдерісі өте қысқа мерзімде жүзеге асырдық. Клиенттерге қолайсыздық тудырмай екі ірі банктің жүйесін, үдерістерін және портфелін біріктіру өте қиын, әрине. Алайда біздің команда бұл міндеттің үдесінен шыға алды.
Кәсіби мансабымда алғаш сол кездегі екінші деңгейлі банктер (ЕДБ) арасында ТОП-2-ге кіретін еліміздің ең ірі банктерінің бірінде жұмыс істедім. Қазір ол банк нарықта жоқ. Ол жерде мен заңды тұлғаларға несие беру бойынша жақсы тәжірибе жинадым және тәуекел-менеджмент бойынша мансабымды бастадым. Екінші жұмыс орным Қазақстанның ЕДБ ТОП-8 құрамына кіретін кіші банк болды, онда мен тәуекел-менеджер ретінде жұмыс істедім және бірнеше жыл ішінде маман позициясынан тәуекел-менеджмент блогының атқарушы директоры лауазымына дейін өстім.
ЦентрКредит Банкі 2018 жылы Несие тәуекелі департаментіне басқарушылық лауазымға шақырды және мен Басқарма төрағасымен ақылдаса отырып, бұл ұсынысты қабыл алдым. Жұмыс істеген әрбір банкте өзіндік оң ерекшеліктер мен күшті жақтары болды, бірақ қазіргі жұмыс орнымда корпоративтік мәдениеттің қыр-сырын, сын-қатерлер мен тәуекелдерге орайлы көзқарасты, клиентке бағдарлануды, инновацияларға дайындықты, өз құндылықтарыма адалдықты анық сезіндім. Ұжым мен басшылықтан да қолдауды таптым.
Банк қызметіндегі тәуекелдер сан қырлы: қаржылық тәуекелден басқа операциялық тәуекел, несие тәуекелі, портфель тәуекелі, комплеанс-тәуекел, ақпараттық қауіпсіздік тәуекелі және басқа да сын-қатерлер бар. Шын мәнінде, банктің барлық қаржылық қызметі тұрақтылықты арттыру және табыс табу мақсатында тәуекелдерді басқару болып саналады. Бізде тәуекелдердің әрбір бағытын өз ісінің мамандары басқарады, бұл банктің қаржылық көрсеткіштерінен айқын көрінеді.
Банк шағын және орта кәсіпкерлерге кредит беруді дамытуға айтарлықтай күш жұмсады және қазіргі уақытта ШОБ үшін, оның ішінде мемлекеттік бағдарламалар шеңберінде жылдам өнімдерді ұсыну бойынша көшбасшы болып саналады.
Табиғат оянатын, түрленетін және барша әйел қауымы құлпырып шыға келетін көктем мерекесін айрықша жақсы көремін. Менің есімім де осы мерекенің негізін қалаушылардың бірі саналатын Клара Цеткинмен аттас, тиісінше осы күні өз есіміме қатысты көп әзіл де естіп жатамын. Клара Цеткин қалыптастырғысы келген мерекенің мәні әйел теңдігі үшін күрес болды және ол қазір де өзекті болып қала береді. Дегенмен нәзіктік пен сұлулықты дәріптейтін қазіргі мәні де маған ұнайды.
Мерекеде ең бірінші анамды құттықтаймын, оны жақсы көретінімді айтамын. Сосын сүйікті әпке-сіңілдерімді, құрбыларымды, әріптестерімді құттықтаймын. Әрине, түрлі спа-процедуралар қабылдап, демалып, серуендеп, мереке күні өзіме де жағдай жасауға тырысамын.
Қазақстанның қаржы секторы алдына үлкен мақсат қойған әйелдердің дамуы үшін мол мүмкіндік ашып жатыр деп есептеймін. Бұл сөзіме қаржы саласында айтарлықтай жетістікке жетіп жүрген әйел азаматтар дәлел бола алады.
Клара Эрмакбаева,
ЦентрКредит Банкі Тәуекел-менеджмент орталығының басқарушы директоры