Наурыз мейрамын мерекелеу аясында көрнекті ғалым Қаныш Имантайұлы Сәтбаевтың туғанына 125 жыл толуына арналған облыстық оқушылар айтысы болып өтті.
Сәтбаев қаласындағы Ш.Ділдебаев атындағы Кеншілер сарайында «Нар тұлға, тау тұлға!» тақырыбымен өткен айтысқа Жезқазған, Сәтбаев қалаларының, Жаңаарқа, Ұлытау аудандарының мектеп оқушылары қатысып, сөз көрігін қыздырды.
Сыр сүлейі Тұрмағамбет Ізтілеуұлының өзінен кейінгі толқынға қарап тұрып, «Сүйріктей судан шығып келе жатқан, Жас ақын және де көпсөзді настар. Жаңартпай бұлар жұртты қояды ма, Болған соң біреуі – тыс, біреуі – астар» деп сүйіспеншілік білдіретіні секілді, оқушылар айтысына қатысқан талапкерлердің аяқ алыстрына қарап, олардың ертеңі танылғандай болды.
Айтыстың арасында көрермендер жас жыршы-термешілердің өнерлерін де тамашалады.
«Лұқпан Хакім «Ұрпағыммен мың жасаймын» деген ғой. Сол айтпақшы, ұлттық тамырдан нәр алған өнерлі ұл-қыздарымызды көргенде қуанамын, еліміздің ертеңін көргендей боламын. Жеткіншектер арасында осындай іс-шараларды жиі өткізіп тұрсақ, ұтарымыз көп болмақ. Жастар бірте-бірте жетіледі, шыңдалады», – деді өнерлі жастарға сүйсінісін білдірген Қазақстан Жазушылар одағының мүшесі, ақын Мұса Тілеуов.
Айтыстың 100 мың теңгелік бас бәйгесі жезқазғандық 8-сынып оқушысы Жұбан Камалбекке бұйырды.
Ұлытау облысы