Франция астанасы Парижде алауы тұтанатын жазғы Олимпия ойындарының басталуына санаулы күндер қалды. Төрткүл дүние тағатсыздана күткен, төрт жылда бір келетін ең дүбірлі дода биыл 26 шілде мен 11 тамыз аралығында өтеді.
Париждегі додаға әлемнің 205 елінен 10 мыңнан аса спортшы қатысады деп жоспарланған. Бұл байрақты бәсекеде 32 спорт түрінен 329 медаль жиынтығы сарапқа салынады.
Еліміздің Туризм және спорт министрлігінің хабарлауынша, Қазақстан ұлттық құрамасы спорттың 20 түрінен бақ сынамақ. Қазіргі таңда Қазақстан делегациясының қоржынында Париж Олимпиадасының 11 спорт түрінен 31 лицензиясы бар. Атап айтқанда, мұның алтауы – бокс (ерлер), бесеуі – нысана көздеу, төртеуі – садақ ату, төртеуі – семсерлесу, үшеуі – тасжолдағы велоспорт, екеуі – қазіргі бессайыс, екеуі – таеквондо, сондай-ақ бір-бірден бокс (әйелдер), грек-рим күресі, еркін күрес, спорттық гимнастика , батуттағы гимнастика сияқты спорт түрлеріне тиесілі.
Лицензия санын өңірлер үлесіне бөлер болсақ, Алматы, Шымкент қалалары мен Жетісу облысы үздік нәтижемен көш бастап тұр. Үшеуінің де еншісінде бес жолдамадан бар. Кейінгі орындарға ШҚО (4), Астана қаласы (3), Жамбыл (2), СҚО (2), Ақмола (1), Қызылорда (1), Абай (1), Қарағанды (1) және Түркістан облыстары (1) жайғасқан. Ал қалған өңірлерде Олимпиаданың бірде-бір жолдамасы жоқ.
Айта кетейік, Олимпия ойындарына дейін әлі 50-ден аса лицензиялық жарыс бар. Оның ішінде спортшыларымыз әлем чемпионаттары, Азия чемпионаттары және рейтингтік турнирлерге қатысады.