Мессенджерлер мен әлеуметтік желілерде су тасқынынан зардап шеккендерге Еңбек және халықты әлеуметтік қорғау министрлігі тарапынан өтемақы төленетіні туралы хабарлама тарап жүр. Ведомство өкілдері бұл ақпаратты жоққа шығарды, деп жазады Egemen.kz.
Аталған министрліктің өтемақы төлемдерін жүзеге асыратыны туралы жалған ақпарат таратып жатқан белгісіз тұлғалар төлем алу үшін «Толығырақ» түймешігін басуды немесе сілтеме бойынша өтуді ұсынады. Тиісінше, хабарламада көрсетілген сілтеме пайдаланушының жеке деректерін ұрлап алу мүмкіндігін туғызады.
Айта кетсек, Мемлекет басшысының тапсырмасына сәйкес су тасқынынан зардап шеккен азаматтарға жергілікті атқарушы органдар біржолғы төлемдер төлейді. Мөлшерi материалдық шығынды есептейтін арнайы комиссиялардың шешiмi бойынша әр өңiрде жеке белгiленеді.
Мемлекеттік қолдау туралы ресми ақпарат тек 1414 нөмірінен СМС-хабарламалар арқылы жіберілетінін еске саламыз.