Азиядағы өзара іс-қимыл және сенім шаралары кеңесінің хатшылығы Астана әкімдігінің қолдауымен биыл да Президент саябағындағы АӨСШК аллеясын абаттандыру бағытындағы дәстүрлі іс-шарасын өткізіп, ағаш көшеттерін екті.
Табиғатты аялауды дәріптеген акцияға Экология және табиғи ресурстар министрі Ерлан Нысанбаев, Астана қаласы әкімінің орынбасары Ерсін Өтебаев, сондай-ақ АӨСШК-ге мүше мемлекеттердің елшілері мен дипломатиялық корпустың өзге де өкілдері қатысты.
Аллея 2021 жылдың 1 маусымында АӨСШК-нің 30 жылдығы қарсаңында ашылған. Мұндай бастама ұйымның қоршаған ортаны қорғау жөніндегі зерттеулеріне негізделген басты бағыттарын іске асырып, Тұрақты даму мақсаттарына қол жеткізу жолындағы жұмыстарына ұжым болып атсалысуды көздеп отыр.
Биыл акция қатысушылары 100 түп сакура ағашы, Сиверс алмасы мен қызыл шетен ағаштарынан бөлек 35 түп майда жапырақты қарағаш көшеттерін отырғызды.
– Қолға алынып жатқан бұл бастамалар еліміздің табиғи ресурстарын сақтауға ғана емес, сонымен қатар жергілікті халықтың өмір сүру сапасын жақсартуға және болашақ ұрпақ үшін қолайлы жағдай жасауға септігін тигізеді, – дейді министр Е.Нысанбаев.
Астана қаласы әкімінің орынбасары Е.Өтебаев, өз сөзінде қала өмірінде экологиялық тұрақтылыққа деген талпыныстың барын атап өтті. Ол сондай-ақ АӨСШК аллеясын жаңа көшеттермен толықтырып, жетілдіру секілді игі бастамалар арқылы мемлекеттер арасында қоршаған ортаны қорғау саласындағы ынтымақтастықты дамытудың маңызы зор екенін атап өтті.
Ал Азиядағы өзара іс-қимыл және сенім шаралары кеңесінің бас хатшысы Қайрат Сарыбай қоршаған ортаны қорғау жолындағы акцияға атсалысып, игі бастамаға үлес қосқан азаматтарға алғысын жаудырып, олардың осындай іс-шаралар арқылы ұйымға қолдау білдірген ықыластарына ризашылығын білдірді.
Ол сондай-ақ АӨСШК-нің экологиялық зерттеулер аясындағы ынтымақтастығының артып келе жатқанына тоқталып, оның жарқын мысалы ретінде Президент Қасым-Жомарт Тоқаевтың қоршаған ортаны қорғау мәселелері бойынша АӨСШК-нің Министрлік конференциясын шақыру жөніндегі бастамасын атап өтті.
Сондай-ақ Қайрат Сарыбай Әзербайжанның төрағалығымен өтетін АӨСШК Министрлер кеңесінің отырысы биыл қараша айында Бакуде БҰҰ-ның Климаттың өзгеруі жөніндегі конференциясының (COP-29) басталуымен тұспа-тұс келетінін, бұл экологиялық проблемаларды шешу жолындағы бірлескен жұмыстың өзектілігі мен дер кезінде көтерілген мәселе екенін кезекті мәрте көрсетіп отырғанын атап өтті.