Биылғы жаңбырлы көктем күн сайын мыңдаған көшет отырғызылып жатқан Алматыны бұрынғыдан да көркейтіп, «Таза Қазақстан» республикалық экологиялық акциясы мен «Алматы – біздің ортақ үйіміз» науқанына шын мәнінде серпін берді. Ал Жеңіс күні Алматыдағы Ә.Жангелдин атындағы гүлзарда Ардагерлер аллеясы ашылып, оған соғыс және еңбек ардагерлері ортақтасты.
Жаңа аллеяда жүз шақты көшет отырғызылды. Оңтүстік шаһарды жасыл желекке көмкеріп, жастарды елжандылыққа бастайтын ұлағатты іс-шара барысында Жетісу аудандық ардагерлер кеңесінің төрағасы Тамара Шәкірова: «Кез келген мемлекеттің әл-ауқаты қарттар мен балаларға деген көзқарасымен өлшенеді. Сондықтан бүгінгі іс-шара өте маңызды деп есептейміз. Алматыда 43 соғыс ардагері қалды, еңбек майданына қатысушылар да көп емес. Жетісу ауданында тұратын бір ғана ардагер Илья Кудиннің бүгінгі мерекеге келгеніне өте қуаныштымыз», деп атап өтті.
Жаңа аллеяның ашылуына арнайы шақырылған ауданның құрметті зейнеткерлерінің ризашылығын Құлшара Сиенова жеткізді: «Мен Отанымызға қызмет еткендерге дән ризамын. Бүгінгі қоғамда олардың ерлігі мен еңбегін құрметтеп, есте сақтағанын көру мен үшін мақтаныш. Бұл аллея әрбір адам аялдап, ойланып, ұмытылмас кезеңдер мен құндылықтарды еске алып, келешекке жеткізетін демалыс мекеніне айналатынына сенемін», деді.
Алматы қаласының әкімі Ерболат Досаев соғыс ардагерлерінің шаңырақтарына барып, Мемлекет басшысы Қасым-Жомарт Тоқаевтың құттықтауын тапсырды.
Алдымен қала әкімі 1925 жылы 99 жастағы Иван Бегуновтың үйіне барды. Украинаның Житомир қаласында дүниеге келген Иван Матвеевич кейін Ақтөбе облысында кеңес әскері қатарында қызмет атқарып, сол жерден майданға аттанып, 228-гвардиялық атқыштар полкінің құрамында Еуропаны азат етуге қатысқан.
«Иван Матвеевич, сізді көргеніме өте қуаныштымын. Келесі жылы 100 жылдық мерейтойыңызбен құттықтаймыз деп үміттенемін. Сізге бас иіп, тағзым етіп, Жеңіске қосқан үлесіңіз үшін алғыс айтамыз. Өзіңіздей батырмен мақтанамыз», деді Е.Досаев.
Қала басшысы соғыс ардагері Дарбала Жабатаеваға да ерекше ілтипат көрсетті. Қостанай облысының тумасы Дарбала Әміржанқызы қысқамерзімді курстан байланысшы мамандығын алған соң, 1943 жылы 18 жасында өз еркімен майданға аттанады. Бойжеткеннің алдында фашистердің саны мен орнын анықтап, ол деректерді жедел түрде рация арқылы штабқа хабарлау деген жауынгерлік міндеті тұрды. Қиян-кескі шайқастардың бірінде қазақ қызы жарақат алып, госпитальда емделіп шыққан соң, ІІ Беларусь майданының 4-танкке қарсы артиллериялық бригадасына аттанған. Дарбала Әміржанқызы жауынгерлік жолын Германияда аяқтаған.
Мәртебелі орден-медальдармен марапатталған соғыс ардагері осыдан кейін де 30 жыл бойы жауапты қызметтерді атқарған. Бүгінде Дарбала Әміржанқызы бес немере мен алты шөберенің сүйікті әжесі.
Алматы әкімінің ардагерлердің отбасына барып, дидарласуы ағайын-туыстың ортасында есте қаларлықтай, ерекше ықыласпен өтті.
АЛМАТЫ