Халықаралық шай күніне арналған қысқа ғана бейнежазба әлеуметтік желілерде тарап кетті, деп жазады Egemen.kz.
Бұл бейнежазба АҚШ-тың Қазақстандағы елшілігінің Instagram-парақшасында жарияланған.
БҰҰ Бас Ассамблеясының 2019 жылғы желтоқсандағы қарарымен 21 мамыр - Халықаралық шай күні (International Tea Day) деп бекітілген. Ал Қазақстанда шай ең танымал сусын саналады.
Қысқа бейнероликте АҚШ-тың Қазақстандағы елшісі Дэниел Розенблюм Астанада қонақтарды қалай қарсы алғаны, содан кейін іскерлік кездесуден кейін шығарып салғаны көрсетіледі. Әрі қарай ол еліміздің кез келген азаматына түсінікті сөз тіркесін айтады.
- Ал енді өзіміз отырып, шай ішейік, - дейді Дэниел Розенблюм күлімсіреп.
Елшілік Қазақстанда шайдың жай сусын емес екенін атап өтті.
- Бұл қонақжайлылық, достық пен дипломатияның символы. Халықаралық шай күні құтты болсын! – деп құттықтайды елшілік.
Жазбаға қазақстандықтар түрлі пікір қалдырып, бұл жақсы үрдіс екенін айтқан.