Кеңес Одағының батыры, Халық қаһарманы, еліміздің тұңғыш Қорғаныс министрі, армия генералы Сағадат Нұрмағамбетов атындағы әскери колледжде батырдың ғасырлық мерейтойына орай конференция өтті.
Іс-шараға «Tayelsiz Qazaqstannyn Halyq Batyrlary» РҚБ басшысы, Халық қаһарманы, генерал-лейтенант Бақытжан Ертаев, «Қарулы күштер ардагерлері» РҚБ төрағасының орынбасары, генерал-майор Марат Нағұманов, Қорғаныс министрлігі Әскери білім және ғылым департаменті басшысының орынбасары, полковник Амангелді Тоғысов, Ұлттық қорғаныс университеті, Л.Н.Гумилев атындағы Еуразия ұлттық университеті, М.Жұмабаев атындағы Халықаралық колледждің оқытушылары, әскери оқу орнының кадеттері мен ұландары қатысты.
Іс-шара әскери колледж аумағында орналасқан Сағадат Нұрмағамбетовтің бюстіне гүл шоқтарын қоюдан басталды. Салтанатты рәсімге қатысушылар батырды бір минут үнсіз тұрып, еске алды.
Қарулы күштердің Мемлекеттік әскери-тарихи музейінің қолдауымен колледжде батырдың өмірбаянының кезеңдерін бейнелейтін фотокөрме, әйгілі генералға арналған мұражай экспозициясы ашылды. Онда генерал формасы, кителі, Екінші дүниежүзілік соғыста пайдаланған командирлік сөмкесі мен картасы, Сағадат Нұрмағамбетовтің бейнесі тоқылған кілем ілінген.
Жиынға қатысушыларға арнап Қарулы күштердің ардагерлері Бақытжан Ертаев пен Марат Нағұманов құттықтау сөз сөйледі. Конференцияда Ұлттық қорғаныс университетінің аға оқытушысы, полковник Асқар Макипов, Л.Н.Гумилев атындағы Еуразия ұлттық университетінің әскери кафедрасының оқытушысы, полковник Атығай Балғабеков, М.Жұмабаев атындағы Халықаралық колледжінің оқытушылары, подполковник Ерлан Серікбаев пен капитан Серік Сүлейменов баяндама жасады.
Жиын барысында сөз сөйлегендер Сағадат Нұрмағамбетовтің өмірі мен жауынгерлік жолының жастарды әскери-патриоттық тәрбиелеу ісіндегі маңызын атап өтті. Қазақстанның тұңғыш Қорғаныс министрінің есімімен аталатын әскери колледж тәрбиеленушілері Сағадат Қожахметұлының өмірбаянын жақсы білетінін айта кеткен жөн. Батырдың құрметіне оқу орнының хоры «Сағадат» әнін, Отан қорғаушыларға арнап басқа да шығармалар орындады. Ал жас ұлан Әмзехан Сәтжан Халық қаһарманы Сағадат Нұрмағамбетов туралы шығарған өлеңін оқып берді.