Қарағанды облысында қазірдің өзінде 42 ауыл мектебі жоғары жылдамдықты интернетке қосылды, шілде айының соңына дейін тағы 64 мектеп сапалы байланыспен қамтамасыз етіледі, деп хабарлайды Egemen.kz.
«Облыс бойынша бізде 410 мектеп бар, оның 106-сында интернет жылдамдығымен мәселелер болды. 20 мамырдан бастап олар SpaceX компаниясының Starlink технологиясы бойынша кең жолақты Интернетке қосыла бастады. Жұмысты шілде айының соңына дейін аяқтауды жоспарлап отырмыз. Жобамен барлығы 8,5 мыңға жуық бала қамтылады», деді ақпараттандыру, мемлекеттік қызметтер көрсету және мұрағаттар басқармасы басшысының орынбасары Мейіржан Жұмаханов.
Көкпекті жалпы білім беретін мектебінде спутниктік жүйенің артықшылықтары бағаланды. Бұл оқу орны интернет жылдамдығы небәрі 8 Мбит/с дейін төмен болған мектептердің бірі.
«Starlink бізге 25 мамырда орнатылды. Бұл өте жақсы мүмкіндіктер береді. Мұғалімдер мен оқушылар риза, жаңа оқу жылында жақсы интернет болады. Бізде төрт информатика кабинеті, 100 компьютер бар: олар әр оқу кабинетінде орнатылған. Бұрын төмен жылдамдыққа байланысты бір мезгілде барлығы жұмыс істеу үшін интернетке кіру мүмкін болмады. Енді бұл мәселе шешілді. Мұғалімдер кез келген цифрлық білім беру ресурстарын пайдалана алады, кез келген уақытта көп күтпестен бейне сабақтар өткізе алады», деді Көкпекті ОМ директоры Гаухартас Жаймина.
Жабдық жиынтығына мектеп төбесінде орнатылған спутниктік антенна, сонымен қатар бірінші қабатта штатив пен маршрутизатор кіреді. Барлық кеңселерде жергілікті желі орнатылды.
Starlink технологиясы ауылдық жерлерде талшықты-оптикалық байланыс желілері орнатылғанша жұмыс істейді. «Қолжетімді интернет» ұлттық жобасы бойынша 2027 жылға дейін Қарағанды облысының 164 елді мекеніне талшықты-оптикалық байланыс желісін тарту жоспарланып отыр. Бұл ауыл мектептеріндегі интернет жылдамдығын барынша арттыруға мүмкіндік береді.
Қырмызы ЖҰМАҒАЛИҚЫЗЫ,
ЕҰУ студенті