«Дәніккеннен құныққан жаман». Құмар ойынға құныққандар ауырдың үстімен, жеңілдің астымен жүреміз деп күн санап құрдымға кетіп жатыр. Букмекерлік кеңселердің әуелде ас татырып арбағанымен, кейіннен аш қатырып сан соқтыратыны әмбеге аян. «Мыңды жеңген – батыр емес, өз-өзін жеңген – батыр» демекші, бәс тігуден бас тартқандар енді «eGov mobile» қосымшасы арқылы құмар ойындарға қатысуын шектей алады.
Мемлекет басшысы Қасым-Жомарт Тоқаев Ұлттық құрылтайда азаматтардың жекелеген санаттары үшін құмар ойындарға қатысты шектеулерді күшейтуді тапсырған еді. Жеңіл жолмен ақша тапқысы келіп, тапқан-таянғанын желге ұшырып жатқан жандарға Цифрлық даму, инновация және аэроғарыш өнеркәсібі министрлігі, Туризм және спорт министрлігінің Туризм индустриясы комитеті, «Ұлттық ақпараттық технологиялар» акционерлік қоғамы бірлесе құмар ойынның құрығынан құтылудың онлайн форматын ұсынды.
Жаңа қызметті ресімдеу үшін «eGov mobile» мобильдік қосымшасында «Қызметтер», содан кейін «Спорт» бөліміне өту керек. Содан соң «Құмар ойындарға немесе бәс тігуге қатысуды шектеу жөніндегі сервисті» таңдайсыз. Ашылған бетте шектеу мерзімінің уақытын анықтап, «Қызметке тапсырыс» түймесін басу қажет. Әрі қарай жылдам қол жеткізу кодын немесе биометрияны пайдаланып қызметке қол қоясыз. Осылайша, өтінім мәртебесімен таныса аласыз. Айта кетейік, құмар ойындарға қатысуын шектегісі келетін азаматтар өтінімді ЭЦҚ арқылы беруге тиіс. Үшінші тұлғалардың өтінім беруіне жол берілмейді.
«Ұлттық ақпараттық технологиялар» АҚ басқарма төрағасы Ростислав Коняшкиннің айтуынша, бұл қызмет лудоманиямен байланысты жеке мәселелерді айтарлықтай төмендетеді. Осылайша, кез келген азаматқа, әсіресе құмар ойындармен шектен тыс әуестенетін тұлғаларға барлық лицензияланған ойын мекемесі мен букмекерлік кеңселердің заңды сайттарына кіруге тосқауыл қойылады.