Польшаның Жешув қаласында спорттық акробатикадан өткен Әлем кубогінің кезеңдік сайысында Диль Даниель мен Вадим Шуляр күміс медальды иеленді.
15 маусымда Оңтүстік Кореяның Мокпо қаласында ядро, диск, балға және найза лақтырудан лицензиялық Азия чемпионатының шымылдығы түріледі. Бұл жарыста Қазақстанның туы астында Иван Иванов (ядро), Артур Гафнер (найза), Евгений Миловацкий (диск) және Анастасия Калошина (балға) сынды спортшылар өнер көрсетеді.
Бұл күндері Хорватияның астанасында «WTT Contender Zagreb» турнирі өтуде. Зәуреш Ақашева үшінші айналымға дейін жетті. Ол сербиялық Драган Виньевич пен италиялық Дебора Вивареллиді ұтқанымен, үшінші кезеңде Токио Олимпиадасының қола жүлдегері, биылғы әлем чемпионы Ли Хо Чингке жол берді. Жұптық жарыста Зауреш пен Вивьен Шольц (Люксембург) таиландтық Джиннипа Саветтабут/Ванвиса Ауэавирияйотхиннен айласын асырғанымен, іле-шала Франциске Шрейнер/Софии Кли (Германия) есе жіберді. Ал Алан Құраманғалиев және Айдос пен Дастан Кенжеғұловтар бастапқы бәсекелерінде сүрінді. Алан гонконгтық Чан Болдуин, Айдос чехиялық Любомир Янчарик және Дастан мысырлық Мохамед Эль-Беиалидің осал тұсын таба алмады.
Ыстанбұлдың «Бешикташында» ойнап жүрген еліміздің танымал футболшысы Бахтиер Зайнутдинов келесі маусымда Ресей Премьер-лигасына оралуы мүмкін. Кейбір дереккөздерге сенсек, Қазақстан құрамасының жартылай қорғаушысы үшін Санкт-Петербургтің «Зениті» түркиялық клубқа 4,5 миллион еуро төлеуге әзір. Қазіргі кезде қос тарап келіссөздер жүргізіп жатқан көрінеді.