Аустралия елінің алғашқы Ақ Олимпиадалық ойындардағы алтынын 2002 жылы шорт-трекші Стивен Брэдбери алып берген еді. Оның өзі қызық болған.
Ол бұған дейінгі төртжылдық додаларда бастапқы кезеңдерден әрі асып көрмеген. Солт-Лейк-Ситиде ол ширек финалда төртінші болып мәре сызығын қиған еді. Бірақ бірінші келген спортшының жарыстан шығуына байланысты Брэбери жартылай финалға өтіп кетті. Ал жартылай финалда соңғы болып келе жатқан аустралиялық спортшы алдындағы шорт-трекшілердің бір-біріне соқтығысуына байланысты мәреге екінші болып жетті. Дәл осы жағдай финалда да қайталанды. Жарыс барысында барлық қарсыласының құлауы, Брэдберидің алтыннан алқа тағуына керемет мүмкіндік ашты. Ешқандай күш салусыз-ақ алтын алуға болатынын көрсеткен спортшыға байланысты өз елінде тіпті «Брэдберише қимылдау» деген тіркес те қалыптасқан.