Канаданың беделді «Fantasia Film Festival» кинофестивалінде қазақ туындысы қазылар алқасы тарапынан жоғары бағаға ие болды. Басты рөлдерді сомдаған Берік Айтжанов пен Анна Старченко фестивальдың үздік актерлері атанды.
Фильм ұжымы үшін айтулы оқиға – оператор Еркінбек Птыралиев Оскар киноакадемиясының мүшелігіне қабылдануы болып отыр. Ол – «Оскар» сыйлығына дауыс беруге қатысатын алғашқы қазақ азаматы.
Режиссер Әділхан Ержановтың «Дала қасқырлары» фильмі бұған дейін «Reims polar 2024» кинофестивалінде француз сыншылар қауымдастығының жүлдесін жеңіп алған болатын. Фильм тәртіпсіздік кезінде ұрланған ұлын іздеп жүрген Тамара есімді әйелдің жан мұңын баяндайды. Ол күмәнді детективтің көмегіне жүгініп, кейін күтпеген оқиғаларға тап болады. Айта кетейік, кинокартина Мәдениет және ақпарат министрлігінің қолдауымен түсірілді.