Керекуде ұлы ақын Абай медет тұтқан Шығыс шайыры Сабыр Сәйхалидің 1905 жылы жарық көрген жинағы табылды. Туынды 296 беттен тұрады.
Бұқар жырау атындағы әдебиет және өнер музейінде шайыр Сабыр Сәйхалидің 1905 жылы Қазан қаласында араб графикасында жарық көрген көне кітабы таныстырылды. Кітапты құрастырған – Исмаил Шамсудинов, атауы – «Диуани Сәйхали». 296 беттен тұратын кітапта діни-тарихи ұзақ жыр жазылған. Дүниенің жаралуынан бастап 680 жылғы Хұсайынның Кербала шөлінде соғысып өлгеніне дейінгі тарих қамтылған.
Сабыр Сәйхалидің есімі Абай өлеңінде аталады.
«Фзули, Шамси, Сәйхали,
Науаи, Сағди, Фирдауси,
Қожа Хафиз бу хаммаси,
Мәдет бер, иә, шағири [1] фарияд [2]».
Белгіленген сөздердің түсінігі келесідей:
[1] - Шағири (арабша) – ақын. [2] - Фәрияд (парсыша) – теңдесі жоқ, асыл.
Демек Абай Құнанбайұлы Шығыстың теңдесі жоқ ақындарынан медет сұраған болса, сол сүйенішінің бірі – Сәйхали ақын.
Ғаламтордағы уикипедия мәліметтеріне сүйенсек, Сабыр Сәйхали – XV ғасырда өмір сүрген ақын. «Диуани Сәйхали» кітабы 1332 жылы Ташкентте, кейін Қазан мен Ыстанбұл қалаларындағы баспадан шыққан.
Бұл кітаптың бірнеше нұсқасы Алматы қаласындағы Ұлттық кітапханада сақталса, тағы бір нұсқасы Абай облысындағы Абай музейінде тұр екен. Абай музейіне Қайым Мұхамедханов тапсырған.
Керекудегі жәдігерді Павлодар қаласының тұрғыны Қалипа Үкенқызы табыстады.
Павлодар облысы