Астанада «Joltap» әлеуметтік бағдарламасы аясында тігін ісі бойынша шеберлік сабағы өтті. Елорда әкімдігінің бастамасымен қолға алынған жоба тұрақты табыс табуға ниеттенген азаматтарға арналған. Бүгінде игі бастама көмегімен 5 мыңнан астам тұрғын оқудан өтіп, олардың 3 мыңға жуығы жұмысқа орналасты.
Әлеуметтік бағдарламаға қатысып, жақсы табыс табу үшін әлеуетін арттыруға келгендердің бірі – Айман Сағындықова. Жоба аясында астаналық тұрғын арнайы маманнан ұлттық киімдерді тігудің әдіс-тәсілдерін меңгерді.
– Қазақтың ұлттық киімі дегенде көз алдымызға оюлы шапан, зерлі қамзол, саптама етік киген, сәні мен сымбаты жарасқан кісінің түр-сипаты ойға келеді. Бұл үйірме жұмысында біз қолөнер түрлерімен айналысу мақсатында шапан және көйлек тігудің технологиясын үйрендік. Әрине, ұлттық киімді дайындау барысы бірнеше кезеңнен өтеді. Мұнда жеке талғамға көбірек зейін қойылады. Шеберлік сағат барысында ою-өрнекті қолмен кестелеу және компьютермен түсіруді көрсетті, дейді ол.
Индира Жадаева да «Joltap» жобасының түлегі. Ісмер оқытушының мұқият бақылауымен үлгіні құрастыру, матаға ауыстыру, пішу және тігу сияқты бірегей бұйымды жасаудың қыр-сырын үйренді.
– Оқығаныма өте ризамын. Мен көптеген жаңа дағдыларға ие болдым және инновациялар туралы білдім, деді қатысушы.
Жалпы, жобаны іске асыруда кешенді жоспар былтыр бекітілген. Бастаманың мақсатты аудиториясы – жұмыссыздар және еңбек нарығында бағдарланбаған NEET санатындағы жастар, тәжірибесі мен біліктілігі жоқ азаматтар. Сондай-ақ кірісін арттыруға мүдделі отандастарымызға арналған.
Бағдарлама аясында тегін қысқамерзімді курстарға «Баршаға мүмкіндік» модульдік пункттерінде жазылуға болады. Оқыту 8 жұмыс дағдысы: тігінші, сәнгер-конструктор, бухгалтерлік есеп негіздері, корпустық жиһаз жасау негіздері, сатушы-кассир, электр газбен дәнекерлеуші, бариста, аяқ киімді жөндеу және 7 цифрлық дағдылар: SMM, сайттарды әзірлеу, бейнемонтаж, графикалық дизайн, мобилография, маркетплейстердегі сауда, таргет бойынша өтеді.