Жастар театрының гастрольдік сапары

«Жәннат» – деструктивті діни ағымдардың қатері ту­ралы қойылым. Отбасының арқасүйер азаматы дүние салғаннан кейін баласы Сүйініш радикалды діни ұйым­ның қатарына қосылады. Санасын тұман, көңілін кү­мән торлаған жас жігіт қазақы таным-түсінікке қы­рын қарай бастайды. Ақыры жанашыр адамдар бауыр­ларынан, ең қорқыныштысы, туған анасынан алыст­ай бастаған жігітті отбасына қайтарудың амалын іздейді.

«Қоғамдағы көптеген бүліктің басы болып отырған діни ағымдардың идеологиясына өнер арқылы қар­сы тұруды көздедік. Тура жолдан тайып, опық же­ген­дер­­дің жан азабын көрген жұрт бұдан өмірлік сабақ ала­ды деген сенімдемін», дейді жастар театрының же­тек­­шісі әрі қойылымдағы ана рөлін сомдаған Гүлнұр Қайырлиева.

Қойылым режиссері Мұқанғали Томанов бұдан бұрын Шыңғыс Айтматовтың «Мәңгүрт», Рақымжан Отарбаевтың «Бас», Иран-Ғайыптың «Сүйінбай» драмаларымен таныс. Оның кіріскен жұмыстарын сараптай отырып, шығармашылық зертханасында адам жанын басты орынға қоятынын байқаймыз.

«Мен әрбір қойылымда адамның сыртқы келбетінен бұрын жанына үңілуге, ішкі жан дүниесін ашуға баса мән беремін. Көпшілік адам қазір өмірінде не болып жатқанын ешкімге, тіпті жақындарына да білдірмейді. Міне, мен соны ашып көрсетуге тырысамын. Бұл ретте ұзын-сонар монологтер емес, эмоция, пластикалық шешімдер арқылы ішкі көңіл күйді жеткізу маңызды. Театр деген үнемі өзгеріп, дамып отыратын құбылыс тәрізді, сондықтан нағыз шығармашылық ізденістер мен жетістіктер алда дегім келеді», дейді режиссер.

Ал екінші қойылым – биыл туғанына 100 жыл толып жатқан көрнекті жазушы Бердібек Соқпақбаев­тың повесі бойынша дайындалған «Менің атым Қожа» спектаклі. Актерлердің образы көпшіліктің көңі­лін­де жақсы жатталған, Абдолла Қарсақбаев түсірген ­фильмнен алшақ кетпеген.

Бұдан бөлек, театр репертуарында «Үйлену оңай» комедиясы мен «Клеопатра» драмасы бар. Театр директоры Әміржан Нұрланұлының айтуынша, алдағы уақытта ұжым Астанадағы Музыкалық жас көрермен театрымен селбестік орнатып, бірлесе жұмыс істеуді жоспарлап отыр.