Елордамызда өтіп жатқан Дүниежүзілік көшпелілер ойындарының екінші күні жарыс жолына шыққан Қорғаныс министрлігі Орталық спорт клубының спортшылары ел қоржынына бес алтын, бір күміс медаль салды.
Қазақ күресі, жамбы ату және кураштан өткен сайыстарда армия спортшылары сәтті өнер көрсетті.
«Дүниежүзілік көшпелілер ойындарында спорттың бес түрінен 14 армия спортшысы сынға түсіп жатыр. Екі күн ішінде олар алты медаль ұтып алды. 2025 жылы Астанада қазақ күресінен халықаралық әскери спорт кеңесінің (CISM) әлем чемпионаты өтеді. Бұл жарысқа осы ұйымның өкілдерін арнайы шақырдық. Бүгінгі жарыс – әскери спортшылар арасында қазақ күресі жарысын дайындау мен насихаттаудың маңызды кезеңдерінің бірі», дейді Қорғаныс министрлігі Спорт комитетінің төрағасы – Орталық спорт клубының бастығы, полковник Арман Әбеуов.
Жамбы атудан Азия стиліндегі жарыста Қарулы күштер қызметкері Батыр Бексауыт чемпион атанды. Бұл спорт түрінен 27 елден барлығы 78 спортшы бақ сынасты.
9 елдің 64 спортшысы қатысқан аударыспақта 70 килоға дейінгі салмақ дәрежесінде Қарулы күштер қызметшісі Алмат Ләтіпбек алтын медаль иеленді.
Қазақ күресінен өтіп жатқан жарысқа 41 елден сегіз салмақ дәрежесі бойынша 274 спортшы (ерлер мен әйелдер) өтінім берген. Балуандар белдесуі Жақсылық Үшкемпіров атындағы жекпе-жек сарайында өтіп жатыр. Бозкілемдегі сайыста Қарулы күштер қызметшілері Бекжан Төлепов (55 кг), Жұмажан Қожамбеков (74 кг) және Бақыт Құсақбаев (60 кг) жеңімпаз атанды.
Ал кураш турнирінде армия балуаны аға лейтенант Марат Байқамұров 100 килодан аса салмақ дәрежесінде күміс медальді жеңіп алды.