«Отау» және «Наурыз» бағдарламалары бойынша қосымша қабылдау жүргізіледі. Қосымша өтінім қабылдау 16 қыркүйекте басталып, 25 қыркүйекке дейін жалғасады. Өтінімді «Баспана маркет» порталында беруге болады.
«Отбасы банк» ипотекалық бағдарламаларға біршама өзгеріс енгізбекші. Нақтырақ айтқанда, оператор «Отау» бағдарламасының шарттары мен «Наурыз» бағдарламасының шарттарын теңестіруді жоспарлап отыр. Клиенттердің тәжірибесін зерттеп, азаматтардың өтініш-тілегін тыңдағаннан кейін «Отбасы банк» екі бағдарламаның шартын бір жүйеге келтіру туралы шешім қабылдаған.
Банк бағдарлама шарттарына бірқатар өзгеріс енгізбек. Атап айтқанда, кезекте тұрған халықтың әлеуметтік осал топтары үшін «Отау» бағдарламасының мөлшерлемесі 9%-дан 7%-ға дейін төмендейді; «Отау» бағдарламасының қатысушылары өтініш берердің алдында депозит аша алады; Несиенің максималды сомасы ұлғайтылады – Астана, Алматы қалаларында 36 млн теңге және басқа өңірлерде 30 млн теңге; Алматы мен Астанадан пәтер алатындарға қойылатын тіркеу талабы алынып тасталды. Сонымен қатар бірыңғай балдық есеп жүйесі енгізіледі. Оған сәйкес, депозит бойынша сыйақы сомасына әр 1 000 теңге үшін 1 ұпай жазылады. Некеге тіркелген болса 5 ұпай, балалары болса, қосымша 10 ұпай беріледі. Халықтың әлеуметтік осал топтары мәртебесі үшін тағы 10 ұпай қарастырылған. Сондай-ақ жасы 35-ке дейінгі азаматтарға 5 ұпай қосылады.
Екі бағдарламада биыл іске қосылды. Бағдарламаға қатысу үшін ерлі-зайыптылардың және кәмелетке толған балаларының 5 жыл қатарынан жеке баспанасы болмауы негізгі талап болып саналады. Үйге әлеуметтік кезекте тұрғандар үшін ипотека мөлшерлемесі 7%-ды құрайды, өзге азаматтар үшін – 9%. Алғашқы жарна – 20%. Ипотекаға ниетті азаматтардың шотында 1 млн теңге көлемінде жинақталған депозиті болуы шарт.