Петропавлда және Солтүстік Қазақстан облысы жолдарында 11 қыркүйектен бастап іске қосылған «ақылды камералар» құрылғылары жол жүрісі қағидаларының бұзушылықтарын автоматты түрде тіркейді, деп хабарлайды Egemen.kz.
Бұған дейін облыста 2022 жылы орнатылған 30 құрылғы жұмыс істеп, сол учаскелерде адамдар зардап шеккен бірде-бір жол-көлік оқиғасы тіркелмепті. Демек, құрылғылар тиімділігін көрсеткен. Биылғы 8 ай бойынша аталған құрылғылар өткен жылдың осы кезеңімен салыстырғанда екі есе аз бұзушылық тіркеген.
Аппараттық-бағдарламалық кешендердің тиімділігіне байланысты және азаматтардың өтініштерін ескере отырып, облыстық Полиция департаменті тағы 24 құрылғы алып, қозғалысы көп учаскелерге орнатылды. Тағы 2 кешен темір жол өтпесіндегі, 3 кешен жаяу жүргіншілер өткеліндегі бұзушылықтарды тіркейді, ал 4 кешен патрульдік автокөліктерде қойылған.
Облыс әкімдігінің баспасөз қызметі мәлімдегендей, қала сыртындағы жолдардың апаттық қауіпті учаскелерінде «Кордон.Про»М аппараттық-бағдарламалық кешендері жұмыс істей бастады. Аталған құрылғылар жылдамдықты асыру, қауіпсіздік белдігін тақпау, көлік басқару кезінде телефон пайдалану, жол таңбаларының бұзушылықтарын тіркейді.