Бухарест қаласында Қазақстанның Румыниядағы елшісі Дәулет Батырашев Румынияның Сауда-өнеркәсіп палатасының (СӨП) президенті Михай Дарабанмен кездесті. Кездесу барысында Қазақстан мен Румыния сауда-экономикалық ынтымақтастығының даму мүмкіндіктері, соның ішінде екі ел сауда-өнеркәсіп палаталары бағыты бойынша ықпалдастығы жайы талқыланды.
Тараптар Қазақстан мен Румынияның және жалпы Орталық Азия мен Шығыс Еуропа өңірлерінің экономикалық жағдайы жөнінде пікір алмасты. Туризм, ауыл шаруашылығы, құрылыс, көліктік-транзит салаларында екіжақты экономикалық байланыстардың қолда бар, бірақ толығымен жүзеге асырылмаған мүмкіндіктерін, Қазақстан мен Румыния арасындағы сыртқы сауда көлемінің елеулі өсуін атап өтті. Осы орайда, қазақстандық дипломат М.Дарабанды еліміздің экономикалық әлеуетін толық көрсететін Президент Н.Ә.Назарбаевтың «Нұрлы Жол» Жолдауының, «Қазақстан-2050» Стратегиясының, 2015-2019 жылдарға арналған индустриялық-инновациялық даму бағдарламасының негізгі қағидалары жөнінде хабардар етті.
М.Дарабан Қазақстан мен Румынияның іскерлік топтары арасындағы екіжақты байланыстарды нығайту мен арттыруға мүдделілігін білдірді. Оның ақпараты бойынша, Румыния СӨП құрамына елдің 630 мыңға жуық шағын және орта бизнестің мүшелері кіреді. Сонымен қатар, ол Қазақстанның Констанца теңіз портының терминалдарын (жүк, мұнай және астық) пайдалану мүмкіндігін қарастыруды ұсынды.
Келіссөздер қорытындылары бойынша, екі ел кәсіпкерлері арасында тікелей байланыстар орнату мақсатында Қазақстанның Сыртқы сауда палатасының басқарма төрағасы С.Есімбековтің Бухарестке сапары туралы және Қазақстан мен Румыния іскер топтары бизнес-форумының өткізілуі жөнінде уағдаластықтарға қол жеткізілді.
Кездесуге, сонымен қатар, Қазақстанның Құрметті консулы Петру Лифичиу мен СӨП-тің халықаралық мәселелер жөніндегі кеңесшісі, елші Петру Руссу қатысты.
«Егемен-ақпарат».