Өткен түнде АЭС құрылысына қатысты республикалық референдумның exit-poll нәтижелері белгілі болды. Мұндай зерттеуді бірнеше институт қатар жүргізген. Бірақ олардың барлығының ұсынған нәтижелері аздаған пайыз айырмашылығы болғанымен, негізінен ұқсас.
«СОЦИС-А»: 69,8% дауыс қолдау тапты
Орталық коммуникациялар қызметінде өткен брифингте «Астана – кешенді әлеуметтік зерттеулер институты» («СОЦИС-А») жеке қоры жүргізген exit-poll нәтижелері жарияланды.
Аталған институттың талдаушысы Әлібек Тәжібаевтың айтуынша, «Астана – кешенді әлеуметтік зерттеулер институты» жеке қоры «Хабар» агенттігі» АҚ тапсырысымен 2024 жылдың 6 қазанында дауыс беру учаскелерінен шыға берісте exit-poll әдістемесі негізінде азаматтардың ерік білдіру нәтижелерінің алдын ала есебін жүргізді.
Ол «Үздіксіз ағын» әдістемесінің көмегімен еліміздің 189 учаскесінде дауыс берген 283 519 азамат қамтылғанын айтты. Олардан референдум аясында қойылған «Сіз Қазақстанда атом электр стансасын салуға келісесіз бе?» деген сұраққа қалай жауап бергені сұралды.
«Exit-poll қорытындысы мынадай: сауалнамаға қатысқан азаматтардың 69,8%-ы АЭС құрылысын қолдап дауыс бергенін мәлімдеді. Сауалнамаға қатысушылардың 30,2%-ы өздерінің келіспейтінін айтқан. Учаскелерге келу көрсеткіші 67,3% деңгейінде тіркелді. Деректердің қателігі ± 1,5% құрайды», деді Ә.Тәжібаев.
ЕИИ: 71,8% дауыс – «иә»
Еуразиялық интеграция институты Zakon.kz ақпараттық порталының тапсырысымен АЭС құрылысы бойынша референдумда exit-poll сауалнамасын жүргізді. Бұл нәтижені институт өкілі Әйгерім Есенболатқызы мәлім етті.
Оның айтуынша, «Сайлау туралы» және «Республикалық референдум туралы» заңдар талабына сәйкес институт Референдумның орталық комиссиясын exit-poll өткізетіні туралы алдын ала құлақтандырған. Аталған сауалнама еліміздің 17 облысы мен Астана, Алматы, Шымкент қалаларында 250 учаскеде жүргізілді. Оның ішінде 159-ы – қалаларда, 91-і ауылдарда арнайы дайындалған сұхбатшының көмегімен face-to-face, яғни бетпе-бет әдісімен өткен. Зерттеу нәтижесінің қателігі 1 пайыздан аспайды.
Таңғы сағат 7.00-ден кешкі 20.00-ге дейін жүргізілген сауалнама нәтижесінде «Сіз Қазақстанда атом электр стансасын салуға келісесіз бе?» деген сұраққа дауыс берушілердің 71,8 пайызы «Иә, келісемін» деп жауап берді. Ал 28,2 пайызы «Жоқ, келіспеймін» деген жауапты таңдағанын мәлімдеді.
Институт мамандары exit-poll сауалнамасына қатысқан әрбір дауыс беруші аты-жөнінің құпиялығы қатаң сақталатынын айтады.