Қазақ ұлттық қыздар педагогикалық университетінде отандық педагогика ғылымының дамуына сүбелі үлес қосқан көрнекті ғалым Күләш Құнантайқызы атындағы дәрісхана ашылды.
Ол – еліміздегі әйелдер арасынан шыққан алғашқы педагогика ғылымдарының докторы, академик. Мазмұнды іс-шара аясында «Қазақстандағы білім саласында әйелдердің рөлі» атты тақырыпта конференция өтіп, онда ғалымның ғибратты өмірі мен ғылыми қызметі жайында баяндама оқылды.
– Бұл кісі менің ғылыми жетекшім болды. Ұзақ уақыт жанында жүріп, көп тәлім-тәрбие алдым. Біліммен сусындадым. Ғылымның қыр-сырын меңгердім. Аяулы ұстазымның адами болмысына үнемі тәнтімін. Бізді тек маман ретінде ғана емес, тұлға ретінде қалыптасуымызға ықпалын тигізді. Қазір біз сол кісі салған ізбен шәкірт тәрбиелеп жүрміз. Күләш Құнантайқызы – менің ғылымдағы анам. Бүгінге дейін қол жеткізген жетістігіме оның қосқан үлесі мол. Ардақты ғалымның еңбегін елеп, есімін ұлықтаған университет басшылығына ризашылығымды білдіремін, – деді Л.Н.Гумилев атындағы Еуразия ұлттық университетінің профессоры, педагогика ғылымдарының докторы Перизат Сейітқазы.
Қазақ ұлттық қыздар педагогикалық университетінің ректоры Гүлмира Қанай ғалымның қазақ қыздарының жоғары білім алуына сіңірген еңбегіне тоқталды.
«Күләш Құнантайқызы Қыздар педагогикалық институтын 16 жыл басқарды. Қазақ қыздарының жан-жақты білім алуына, ғылыммен айналысуына ұйытқы болды. Ғалымның көзі тірісінде 400-ден аса оқу құралы мен оқулықтар және монографиялары жарық көрді. Күләш Құнантайқызының жетекшілігімен бірнеше ғылым кандидаты мен докторлар дайындалды. Бүгінгі күнде де «Құнантайқызының ғылыми мектебі» жас мамандар даярлау ісінде жалғасын тауып келеді», деді ол.
Іс-шара соңында жекеменшік медициналық орталық атынан 4 студентке 3 миллион теңге көлемінде Күләш Құнантайқызы атындағы грант беріліп, ұстаз еңбектері қойылған көрме ұйымдастырылды.
АЛМАТЫ