Президент жанындағы Қазақстанның стратегиялық зерттеулер институты 8 облыстан өкілдік ашты. Өңірлік желі аймақтардың әлеуметтік-экономикалық даму серпінін бақылауға, түрлі талдамалық материалдардың сапалы болуына ықпал етеді.
Өңірлік желі әзірге Солтүстік Қазақстан, Қостанай, Шығыс Қазақстан, Павлодар, Маңғыстау, Ақмола және Абай облысында ашылды. Алдағы уақытта кезең-кезеңімен өзге аймақтардан да ашылады деп жоспарланып отыр. Бұл туралы жиында ҚСЗИ директоры Еркін Тұқымов айтты. Сондай-ақ ол бұл бастама өңірлердің аналитикалық әлеуетін нығайтуда маңызды қадам екенін атап өтті.
– Президент Қасым-Жомарт Тоқаев халыққа Жолдауларында мемлекеттік саясаттың негізгі басымдықтарының бірі өңірлерді дамыту екенін баса айтқан. «Қуатты өңірлер – қуатты ел» – бұл жай ғана әдемі сөздер емес, елімізді жаңғыртудың айқындаушы формуласы. Осы орайда өңірлік зерттеулерді сапалы әрі жан-жақты жүргізу аса маңызды. Экономикалық және әлеуметтік саладағы нақты көріністі «өңірден» көретін болсақ, біз сапалы талдаулар дайындап, өңірлерді қолдау мен дамыту бойынша кешенді ұсыныстар әзірлей аламыз, – деді Е.Тұқымов.
Іс-шараға Сенат және Мәжіліс депутаттары, академиялық және сарапшылар қоғамдастығының өкілдері қатысты. Олар бастаманы қолдап, сауалдарын қойып, өңірлік желі қамтуға тиіс ұсыныстарын ортаға салды.
– Облыстағы сарапшылар мейлінше тәуелсіз болғаны дұрыс. Оларға өңірдің әлеуметтік-экономикалық ахуалын зерттеуде, өткір мәселеде сараптама жасауда жергілікті мемлекеттік органдардың басқа да мекемелердің ықпалы болмауы керек. Өйткені көп жағдайда Президент әкімшілігіне жинақталатын ақпараттар аймақтағы толық картинаны көрсетпейді. Халықтың мұң-мұқтажына құлақ асып, ішкі саяси мәселелерді назарға алған абзал. Бұл ретте орталық аппараттан бақылайтын, яғни Қазақстанның стратегиялық зерттеулер институты базасында кеңес құрылғаны жөн. Оған ықпалды азаматтарды тартуды көздеу керек. Байқасақ, қазір бір кішкентай ғана ауданның өзінде 10-20 кеңес бар. Барлығы сол жергілікті мекендегі проблеманы шешіп отыр деу қиын. Тіпті кеңеске жұртшылық сенім білдірген блогерлерді де тарту мәселесін әбден ойластыру қажет. Өйткені олар мәселені ашық жеткізгенімен, хабардарлық деңгейін көтергенімен, түйінін тарқатпайды. Демек осы орайда өңірлік желінің мықты сарапшылары көмек болады деп ойлаймын, – деді Сенат депутаты Ғалиасқар Сарыбаев.
Пікірлер талқыланған соң, қатысушылар аймақ өкілдерінің талдамалық және зерттеушілік дағдыларын дамуға бағытталған тренингтің куәсі болды. ҚСЗИ сарапшылары аймақтық әріптестеріне сандық және сапалық зерттеу әдістері, аналитикалық құжаттардың түрлері және олардың құрылымы туралы айтып берді. Ғылыми зерттеулерді жоспарлау бойынша практикалық кеңестер, ақпараттық қауіпсіздік тақырыбы қаузалды.