Астанада фарабитанушы ғалым Ақжан әл-Машаниге арналған «Рухани мұра және қазіргі ғылым» тақырыбында халықаралық ғылыми-практикалық конференция өтті. Іс-шараны қалалық Білім басқармасының қолдауымен Әдістемелік орталық, Ақжан әл-Машани атындағы №92 мектеп-лицейі, Қолжазбалар және сирек кітаптар ұлттық орталығы, Л.Гумилев атындағы Еуразия ұлттық университеті бірлесіп ұйымдастырды.
Жиын барысында қазақтың тұңғыш фарабитанушысы Ақжан әл-Машаниге арналған мұражай салтанатты түрде ашылды. Оған Парламент депутаттары, Халық қаһарманы Тоқтар Әубәкіров, Иран Ислам Республикасының еліміздегі елшілігінің мәдени істері жөніндегі кеңесшісі Әли Әкбар Талеби Матин арнайы шақырылып, ғұлама ғалымның өмір арнасынан сыр шертетін тағылымға толы ғұмырын насихаттап, құнды естеліктерін бөлісті.
– Ақжан әл-Машанидің еңбектерін әлі де насихаттауымыз қажет. Алдағы жылы ғалымның 120 жылдық мерейтойы аталып өтеді. Оны кең ауқымда ұйымдастырып, жас ғалымдарды тәрбиелеуге ықпал етуіміз тиіс, – деді Қолжазбалар және сирек кітаптар ұлттық орталығының директоры Жандос Бекділдаұлы.
Екі бөлімнен тұратын жиынға Ақжан Жақсыбекұлының ұрпақтары да қатысты. Конференция барысында «Машанитану» оқуларын жыл сайын өткізуді рәсімге айналдыру, ғалымның қаламынан туған 23 қолжазбаны жаңа теориялық-методологиялық тұрғыда зерттеп, ғылыми еңбектер дайындау, Ақжан әл-Машани атындағы №92 мектеп-лицейінің үздік оқушыларына «Тұңғыш фарабитанушы-ғалым» атындағы шәкіртақыны тағайындау, мектеп бағдарламасына 5-11 сыныптарға арналған «Машанитану» атты таңдау пәнін енгізу сияқты ұсыныстар айтылды.