Прага төрінде қазақ және чех өнерпаздарының бірлескен концерті аншлагпен өтті. Шығармашылық кеш билеттері екі күнде сатылып кеткен. Өнерсүйер қауым әсіресе Қазақстанның опера әншісі Нұржамал Үсенбаева мен чехиялық баритон Филипп Банжактың дуэтін тыңдауға келген.
Қазақстанның Халық әртісі Нұржамал Үсенбаеваны жергілікті жұрт жақсы біледі. Шығармаларын сүйіп тыңдайды. Классикалық музыка талантының Жофин сарайында өнер көрсетуі ерек мәртебесін көрсетеді. Қазақ-чех әртістерінің бірлескен жобасы еліміздің ұлттық мерекесі – Республика күніне арналды. Мәдени іс-шара Прага мэрінің жоғары патронатымен және дипломаттарымыздың қолдауымен өтті. Концертте дәстүрлі әндер мен классикалық туындылар шырқалды. Ал Солтүстік Чехия оркестрі Төлеген Мұхамеджановтың симфониялық музыкасын орындады.
Кеш соңында чехиялық дирижерге қазақ халқынан естелік ретінде Махамбет поэмасының партитурасын сыйға тартты.
«Бүгінгідей кештер көпшілікке ресми іс-шаралардан гөрі әсерлі болары анық. Нағыз жүректен жүрекке жететін осындай басқосулар көбірек болсын деп айтамын. Өйткені неғұрлым адамдар арасында татулық болса, соғұрлым бейбітшілікті сақтап қаламыз», деді композитор Төлеген Мұхамеджанов.
Үлкен сахнада әлемге әйгілі ариялар да орындалды. Қазақ сопраносы чех тілінде, ал чех баритоны Мұқағали Мақатаевтың сөзіне жазылған «Отан» әнін шырқағанда жиналған қауымның ықыласы ерекше білінді.
«Музыка тілі аударманы қажет етпейді. Музыкант ретінде бізге адамдарды өнер арқылы біріктіру үлкен бақыт», дейді опера әншісі Филип Банджак.
«Қазақстан мен Чехияның мәдени байланысын нығайтатын көптеген жоба ұйымдастырып жатырмыз. Елдегі концерттерге чех әртістері келіп тұрады. Сондықтан біздің достығымыз, біздің байланысымыз бекем», дейді Нұржамал Үсенбаева.
Иә, аталған кештің басты жұлдыздары бірлескен жобаларды бұрыннан бері жүзеге асырып келеді. Сонымен қатар Нұржамал Үсенбаева мен Филип Банджак Еуропа өнері одағының жоғары марапатын иеленген үштіктің қатарына кіреді.
Ватиканның Чехиядағы елшісі Джут Таддеус Около да екі ел арасындағы мәдени байланыстардың алдағы уақытта да жалғасатынына сенімді екенін айтты.
«Бұл – өте жақсы бастама. Жалпы, адамдар арасында бейбітшілік сезімін ұялатудың маңызы өте зор. Қазақтар мен чехтар өз тілдерінде сөйлессе де, бірін-бірі жақсы түсінетіндей болып көрінеді маған. Демек бір байланыс бар», дейді ол.
Екі ел әртістерінің қатысуымен өткен гала-концерт көрермен қауымды да екі елдің өнеріне жақындастыра түскені анық. Ал Қазақстан тарапы Филип Банджакты бейбітшілік елшісі деп жариялады.